將於今年底結婚的「阿公」蘇永康，把握最後機會與JW合唱新歌，他自嘲似阿叔溝妹，講到婚禮時，他得戚地表示叫足二百人幫拖！

與JW相差廿載的蘇永康笑言可以做對方爸爸。

自認蘇永康粉絲的JW，第一次見偶像怕醜到唔敢與對方作眼神接觸！

曾與中、港、台及星馬多位女歌手合唱的蘇永康（阿公），今次與比他細足20年的JW合唱《性情中人》，阿公搞笑地說：「我生得佢出啦！好似阿叔帶個妹唱歌咁！」他坦言二人的年齡差距甚大，故處理MV會特別小心。拍攝前與女友到日本旅行的阿公坦言，MV靈感來自日本歌手，該MV講述男女主角在不同空間，啟發他於加入大量視覺元素：「我同JW喺MV入面好似做自己嘢，但最後會有接觸位，首歌講由朋友變做深交再演變成情侶！」

夢想成真

阿公在去年的雷頌德演唱會上，與JW第一次合唱，發現JW不敢與他有眼神接觸：「戴咗太陽眼鏡都係咁，係咪我氣場勁得滯嚇親佢？」JW即時否認：「我好鍾意佢，但太怕醜所以唔敢望佢！」JW發現雷頌德與蘇永康相熟便隨口說「可以同蘇永康合作就好啦」，豈料雷頌德令她的夢想成真：「同佢合作嗰時即刻變咗小粉絲！」問到與偶像合作有否壓力時，JW大讚阿公好人：「初時有啲緊張，但佢好Nice會帶住我！」而問到阿公年底的婚禮，他表示毫不擔心籌備問題：「我一吹雞就有二百人幫我啦，使乜自己搞！個Wedding Planner做開演唱會製作，所以我一啲都唔擔心！」