盛品儒與o靚模郭奕芯（Ashina）當街上演真人騷，被《東網》全程足本直擊後，更被揭發已與女友蔡一鳳（Michelle）分手。揚言要箍煲的他，先發表愛的宣言，昨日再公開「認錯」，希望事件得益者不要再博宣傳，以免Michelle再受傷害！

盛品儒與蔡一鳳同場出席活動，徇眾要求下尷尬合照。

一心要箍煲的盛品儒，合照後為Michelle開路避追訪。

盛品儒活動後返回寓所，期間愁爆講電話。

前亞視執行董事盛品儒揚言要箍煲，記者發現其社交網站有多張與Michelle的親密照及旅行照，他除了在照片留下「I miss u, Michelle、Miss u」等字眼外，又寫下約300字的「愛的宣言」！該貼內容大致是他當日受酒精影響才被人「有機可乘」，又指事件令他明白「不能失去一個真正關心的人，會用一切方法拯救這段關係，相信Michelle是將來的另一半。」

尷尬合照獻殷勤

昨日與Michelle前後腳出席活動的他說：「當晚諗住傾完嘢就箍煲，點知不勝酒力。全部都係我錯同我嘅責任，對唔住Michelle！希望得益者咪再出嚟宣傳，唔想Michelle再受傷害！（暗示Ashina抽水？）冇講個名。當時酒醉唔知做咗乜，見到錫咗一啖後我有退咗一步。唔緊要，全部係我錯！Michelle係我真真正正等咗三十幾年，就係要等呢個人，分開後我一直傷心。（事件影響復合？）絕對係！但相信成功復合後，感情會更堅固。（同Ashina冇可能？）冇興趣。」

活動上，Michelle在半推半就下，尷尬地與盛品儒合照，盛品儒相當殷勤，更為Michelle開路，以免她受追訪。完成活動後，兩人分乘不同座駕前往盛品儒位於北角的豪宅，盛品儒逗留了一小時後便自行到柴灣。事後，記者致電Michelle問及盛品儒一連串的箍煲行動，她說：「有啲感動。（接受對方？）順其自然啦！（上對方寓所做乜？）去拎番啲嘢。大家暫時做住朋友先，要父母OK先考慮，佢哋嗰關唔一定過到，暫時冇得氹，今日細佬都有監場，佢都嬲爆爆。」