「爆E超蓮」鍾采羲對手工藝極有熱誠，雖然身為藝人工作繁忙，但不忘抽空每星期到工作坊上堂，學不同的Handmade手藝。今次她帶我們上了皮革製作一課，即場DIY屬於自己的獨特小禮物！

最怕同人撞款的Iris，炮製獨一無二小手作就啱晒佢！

工具

DIY話咁易
Step 1
鎅出長方形的羊皮，Size比護照大一點。

Step 2
用深啡色的皮布鎅出四個花邊角，然後塗上白膠漿，貼於皮套四角。

Step 3
為皮套內裏兩側的間隔打洞，然後再於兩洞中間鎅開，作擺放證件的位置。

Step 4
沿住皮套邊打上用作縫線的洞。

Step 5
採用蠟質的線沿邊縫上，一來裝飾，二來確保花邊角不會脫落。

Step 6
以白膠漿貼上英文字母作裝飾。

Done!

Iris獲工作坊老闆娘細心指導，學到嘢！

別以為出生於富裕家庭的「爆E超蓮」鍾采羲（Iris）只會買名牌貨，其實她家中很多收藏都是鍾媽媽傳下來，況且容易撞款，所以她反而對自家製的手作仔大感興趣。近年DIY手作製品十分流行，能夠發揮無限創意小宇宙，又毋須動用廠房製作，環保得來更可從過程中享受樂趣，親手製作絕對比任何名貴禮物更貴重！Iris說：「我唔鍾意同人撞款，所以鍾意特別啲嘅嘢。去旅行都好鍾意行小店，啲老闆娘自己整嘢自己賣，獨一無二嘅手作我至Buy！」她最喜歡一條在泰國買的貝殼手鏈：「有次去布吉旅行，喺市集有個攤位賣好多用天然材料製成嘅飾物同擺設，老闆話手鏈啲貝殼係佢喺海灘執，好欣賞佢愛大自然嗰份熱誠！」

私家「套」夠方便

有手工藝天分的Iris，求學時上美術堂的作品總會貼堂，她說：「上Art堂我就最集中，哈哈！畫畫、做勞作我都好鍾意，做勞作會更喜歡，運用多件細配件，甚至一大匹布，由自己對手慢慢製成一件真正嘅『Made by Iris』作品。」她坦言入行後少了私人時間，但每星期仍會抽空上興趣班。近期她參加皮具製作課程，笑言學門手藝將來開舖頭做老闆娘咁話！今堂Iris製作精美又實用的Passport Holder（證件套），選用柔軟耐用的羊仔皮，除了為Passport着靚「衫」之餘，內裏間隔實用，可擺放登機證、身份證等證件，讓經常出埠的她上落機時出示證件輕鬆快捷！

Iris選用中性又硬朗的啡色皮，與其性格相似：「其實我唔係好Girlish，平時鍾意着T-shirt、牛仔褲，輕便又舒服，只係平時出活動先要女仔啲喳！」話明DIY當然不少得花心思包裝，她說：「工作坊一早預備晒啲材料，已經Cut好所需布料，所以對初學者嚟講都唔會難。」為了讓製成品更別致，她在四角加了花邊，還貼上自己名字「IRIS」四個英文字母，名副其實為自己送上一份禮物。

後記：情陷謎鹿

抵達工作坊時，Iris即時被現場環境設計和擺設深深吸引，四圍欣賞老闆娘設計的皮具，如銀包、散銀包、卡片套、手袋和Clutch等。她最愛掛在牆上的鹿頭裝飾，不停問老闆娘是標本還是假的：「好似真嘅一樣！無論對眼、眼睫毛、鼻同個嘴都好真，啲毛又好滑，好想抬佢返屋企做擺設！」