久休復出的陳慧嫻前晚再踏紅館，以多個新造型示人晒收身成果，還邀得好友張學友任嘉賓，跟慧嫻合唱後更忍不住甜蜜「咀嘴」，引起全場尖叫。

慧嫻突然與學友「咀嘴」，嚇到粉絲尖叫！

慧嫻以貓女造型出場，收完身Fit到震。

慧嫻落台握手時驚見糖妹。

自2003年後再重臨紅館的陳慧嫻，演出一連三場《Back To Priscilla 陳慧嫻30周年演唱會》，前晚順利完成首場。開騷前事先張揚努力Keep Fit的慧嫻不負眾望，以小野貓Look等多個造型晒成果。唱到中段與歌迷握手時，慧嫻發現素有「嫩版陳慧嫻」之稱的糖妹即大叫：「糖妹呀！」逗得對方開懷大笑。

其後，慧嫻在台上大玩感性：「去到今時今日呢刻，我真係覺得非常心滿意足，過咗去嘅種種，我已經唔再執着，未來種種我亦會好堅強面對！」

粉絲尖叫聲四起

隨後，特別嘉賓張學友現身與慧嫻合唱《輕撫你的臉》，唱畢後更互攬兼「咀嘴」，台下即尖叫聲四起，學友又大讚慧嫻：「佢跳到同舞蹈員一樣，再見到佢同舞蹈員一樣身材好好，相信大家今日見到嘅慧嫻先係真正回歸樂壇，作為識咗佢30年嘅朋友非常開心。」自言性格率直的慧嫻則說：「我同學友之間大家心照，有好多嘢唔需要講。」學友即搞鬼地說：「你想我講？係咪想我講佢哋唔知而我知嘅嘢？」嚇得慧嫻耍手擰頭。

另外，慧嫻笑言首場表演像總綵排：「今晚有好多錯漏，我睇騷最鍾意睇第一場，可能鍾意睇蝦碌。」