王敏德女兒王曼喜、湛琪清和陳霽平等昨日出席周大福XCentral Saint Martins藝術珠寶活動，問到公開「出櫃」是否放下心頭大石，王曼喜說：「可以咁講，父母都支持，佢哋都係想我開心，媽咪初初知道就Shock啲，因為佢都想抱孫，不過慢慢適應，但佢哋都戥我開心。（帶咗伴侶見家人？）有，見過兩次。（讚佢？）OK！（爹哋話佢怕醜？）佢比較靜，爹哋媽咪行出嚟有氣勢，所以佢比較靜啲，我哋一齊半年多啲。」

王曼喜曾與男仔拍拖，但現在偏愛與女仔一齊。

大騷香肩的湛琪清心情大靚。

至於有否與男生拍過拖？王曼喜說：「有，試過幾次。（之後唔會同男仔拍拖？）我唔會講一定，經歷過之後覺得自己偏向鍾意同女仔一齊。（女友知唔知你可能同男仔一齊？）我哋兩個心態都好Open，抱住愛唔會為外表原因。」而宣布「出櫃」後，她坦言怕影響形象，亦曾有品牌傾好的活動因事件拒絕她：「大家都有唔同價值觀，尊重唔同決定，做好自己，覺得最重要開心。（細佬妹支持？）妹妹係第一個知，佢哋都支持。」