徐子珊遇車神冇膽「抄牌」

徐子珊與連續四屆F1賽車冠軍德國車神維度爾（Sebastian Vettel）昨日現身北京車展活動，兩人更前往故宮前的「門前大街」拍攝短片，期間子珊坐觀光電單車遊覽，又駐足觀看當地居民捉棋及小朋友玩跳飛機。本身是F1賽車發燒友的子珊指維度爾比賽時認真，並大讚對方私下很有趣：「佢話有人教佢講中文，仲講畀我聽，但其實係啲唔應該講嘅嘢！佢仲問我中文名係咩，大家交流得好開心。」但視他為偶像的子珊，因怕醜而未有向對方「抄牌」取聯絡。