應屆港姐冠軍陳凱琳甫拍處女劇即被人掌摑兼留下陰影，認真慘情！但昨日她獲前輩關菊英及陳國邦大讚醒目好學，更有父母前來探班，足以彌補「痛楚」！

應屆港姐冠軍陳凱琳，獲劇中舅父陳國邦大讚醒目兼好學。

陳凱琳喜獲父母探班，她更肉緊地攬實媽媽！

將於下星期六生日的關菊英表示，最希望家人開心健康。

藝人關菊英、陳凱琳（Grace）及陳國邦昨日為劇集《商戰》在中環拍外景，首次拍劇的Grace更獲父母特地前來探班，她笑言首日拍攝因狂超時而留下陰影：「媽咪喺屋企等我門，見我好遲都未返就好緊張，擔心我有咩事，每隔兩個鐘就打嚟問我幾時返！（NG太多？）唔係，因為廠景Set機好耐，中間又要穿插拍其他人。」

她又透露早前拍攝被女仔掌摑的場口：「為咗唔使打咁多次，我同對手夾定真打，我仲叫佢落力打，最後一Take過！」不過事後她大呼痛到流淚：「從來未試過咁樣畀人打！」

菊姐生日等收驚喜

而分別演Grace母親及舅父的關菊英及陳國邦大讚她醒目好學，已3年沒有拍劇的菊姐更出動私伙拍攝，將於下星期六生日的她，笑言屆時若冇工開便會跟家人食飯慶祝，問到同性密友周偉利會否給她驚喜時，她大方笑說：「話明係驚喜又點知，到時先算！（想收咩禮物？）禮物都係其次，活到我呢個年紀，最緊要就係我同家人都開心健康！」