張苡澂磨拳擦掌

婚後沒有停下來做幸福少奶奶的Venus，對演藝事業更有熱誠，但日夜顛倒的生活卻影響着生理時鐘，為了時刻Keep住靚樣及健康體魄，Venus最近愛上打泰拳，更打出一套養顏、健美的養生方法，令自己精力充沛，Sharp得醒神！她說：「泰拳原本係用嚟學武自衞同提高自我保護能力，但由於運動量好高，每個動作都牽涉身體多組肌肉，可以話係一種全身運動，除咗可以改善身體線條外，更有助血液循環，關節變得更強壯，心肺功能都會增強，真係好處多多，好過食補品養生！」

把握機會

提到愛打泰拳的因由，原來是為了演藝事業而奮鬥！Venus表示除了歌唱事業外，未來的發展大計是投放在電影方面：「我喺北京電影學院畢業，我對電影有濃厚嘅興趣，之前因為機緣而做歌手，依家我想發揮所長，希望喺演藝界發圍！」她坦言愛上打泰拳全因想密謀做打女，進軍荷里活市場：「我出路遇貴人，機緣下認識咗荷里活導演，佢搵緊一個華人女主角，依家仲係好初步！（有冇睇過劇本？）我有睇過故事大綱，都畀劇本吸引住！」她在言語間更踢爆那個「貴人」正是丈夫Michael。

秘密練兵　

問到現在是否加緊秘密練兵？Venus坦言先要地獄式減肥再鍛煉線條美，每個星期都會抽空跟徐家傑師傅學習，她笑言自己曾是練舞及習武之人，不怕辛苦，認為成功是要捱出來的：「我喺北京演藝學院讀書期間，要學散打同跳舞，對拍戲有幫助。」她透露爸爸是太極高手，自小被傳授秘技，而且每晚在家練習一字馬：「我要增強自己嘅柔軟度，令舞姿同武技都揮灑自如、得心應手！」她更笑言練得一身好功夫，就連老公Michael都怕她：「佢見我練到瘦晒，冇心痛，反而買我怕，話驚我當佢係沙包咁打，以後都聽我話，唔逆我意喎！哈哈……」其實Venus同老公Michael經常打情罵俏，羨煞旁人就真！

入門！練無影櫈

源自泰國的泰拳，被視為重要的文化資產，由十三世紀起，泰拳已是皇室貴族鍛煉身體的方法。為免受傷，練拳前要先做好熱身運動，而打沙包及坐無影櫈的空膝姿勢，好處是能強化關節力度，若持續機械式的練習，日子有功，在出拳、踢腿時便不會感到痛楚，更可收放自如。打拳後亦要做緩和運動，與熱身運動一樣主要是拉筋及拉鬆肌肉等。

紮手！有「備」無患

拳手戴上拳套前會以繃帶綁法紮手，不僅可增加核心穩定度，更可令出拳時更有力，還可保護拳頭掌骨，避免手指骨撞傷，而套上護腳則可減少扭傷。在注意事項方面，Venus聽從香港拳擊總會永遠榮譽主席徐家傑的教導，循序漸進，絕不操之過急，她說：「要有服從性，初學者筋骨柔軟度唔夠，好容易受傷，而嗌出聲係要做先聲奪人嘅效果！」而徐家傑則指泰拳有收身之效，亦可訓練紀律性，更能陶冶性情。