張家輝在《魔警》中大騷演技，令導演林超賢大讚其一舉手一投足都滲出心寒感覺，骨子裏「魔性十足」！被視為金像獎影帝大熱的家輝接受娛樂onShow訪問時對此卻不予置評！

林超賢（左）大讚張家輝「魔性」十足，在飾演「韓江」一角時滲出心寒感覺！

林超賢（左起）及張家輝接受主持Angela的訪問，大談拍戲經歷。

在戲中飾演警察的張家輝，一舉手一投足都充滿「戲」味！

張家輝與林超賢日前接受《東網》娛樂onShow主持俞詠文（Angela）的訪問，默契十足的二人原來已是第四度合作！

林超賢自爆在設計「韓江」一角時，心目中的第一人選就是張家輝，他大讚戲份不多的家輝儼如「一代宗師」上身，用出色演技刺激觀眾眼球：「今次佢表演咗『寸勁』﹗用好短嘅時間，但係好勁嘅力量，一個眼神、笑容、神情，都令大家睇到佢個樣就覺得心寒。」

而家輝亦感謝林超賢的準備工夫，令演員可以安心發揮，投入角色：「我拍林超賢啲戲都好舒服，因為佢會幫手解決角色上嘅疑難，令我可以專心去執行佢交畀我嘅事情！」

攞硬影帝？

自言已仁至義盡的家輝更大爆幫林超賢幫到盡，皆因戲中有被火燒的鏡頭，要化上全身被燒焦的特技妝，令他每次放工都要卸妝：「我一收工就伸開對手，有五個人幫我清潔全身，又攞衫畀我換，不過工作人員都對我好好，大家係長期戰友，好錫我！我真係好多謝佢哋！」被謝霆鋒及導演郭子健看好「攞硬」今屆金像獎影帝，家輝即謙虛地說：「金像獎入面所有關於《激戰》嘅提名，每個部門我都希望佢哋攞到！而我就不予置評啦！」