將擔任動作片導演的武打女星陳鈺芸（JuJu）新一年大計多多，決定考電單車駕駛執照，並已計劃買百萬靚車。而為出戰跆拳道亞錦賽而勤練拳的她，自爆日前打到師妹要睇醫生。

打女陳鈺芸試揸型爆電單車，過足癮。

陳鈺芸熱愛武術，擇偶都要識打。

有「香港女版李小龍」之稱的陳鈺芸多才多藝，大學時期修讀電影的她將首執導演筒由打女「升呢」做動作片導演。經常性感示人的她，日前谷胸試揸型爆電單車，一試即愛上更大呼過癮，她表示將花近百萬元購買靚車：「18歲嗰時已經想考（電單車駕駛執照），今年考到後會準備用50至100萬去買車！」

JuJu自嘲是「武癡」，她近日與師妹練拳卻打到對方求醫：「師傅話我出拳開始重，嗰日同師妹對打時，將佢手臂打到瘀黑，最後佢要食消炎藥同睇醫生。（女仔驚咗你啲拳？）係呀，所以依家要同男仔對打。」問她會否擔心太好打而嚇走追求者？她笑說：「唔會，追我嘅人都識打功夫，我哋有共同興趣仲好，例如可以一齊練功夫同睇片研究招式！」

打造「武器房」

談到新動向，JuJu表示要全力減磅備戰跆拳道亞錦賽：「2月時撞正農曆新年同我生日，一日三餐都有人請食好嘢，可惜我要全力減肥去準備4月嘅比賽。依家儲緊特別設計嘅拳套同雙節棍，希望第日可以有間『武器房』擺晒佢哋！」