鮑起靜憑電影《殭屍》火併好戲之人湯唯及「章八后」章子怡，角逐本屆電影金像獎「最佳女主角」殊榮，賽果雖未有定案，她卻已看淡得失，反贈子怡三個字：冇得輸，又指《殭》片為自己寫下一張漂亮成績單。

豁出去接拍《殭》片的鮑姐，有份入圍「女主角」已當自己贏咗！

吳耀漢於《殭》片的造型略嫌陰森恐怖，更因而嚇怕鮑姐。

鮑姐點評子怡演的宮二「冇得輸」，並甘拜下風！

「拜金女」湯唯的實力亦不容忽視，難怪鮑姐看淡得失！

最佳女主角

影壇盛事《第33屆香港電影金像獎》如箭在弦，在五位入圍準影后中，憑《一代宗師》八度封后的子怡成大熱之選，湯唯在電影《北京遇上西雅圖》中的拜金女形象則入形入格，而鮑起靜（鮑姐）在《殭》片幾場演得聲嘶力竭的感情戲同樣令人拍案叫絕，她卻謙虛地說：「有章子怡，點會輪到我？佢得三個字，就係『冇得輸』喇，宮二喎！我同顏卓靈兩個反而冇乜壓力 ，日前見到面仲互相擁抱祝賀，但我反對用『陪跑』嚟形容我哋，覺得自己今次寫咗張好靚嘅成績表，畫咗一個『大剔』畀自己，咁樣已經好滿足喇！」

觀眾「年輕化」

其實鮑姐在《殭》片的戲份不算重，對於該入圍「女主角」或「女配角」，實難有清晰的界線及定位，有資深電影人更曾私下對她說：「如果係女配嘅話，你根本冇得輸！」鮑姐卻有感輸贏並不太重要：「我老公（方平）話，人生能夠有幾多次入圍女主角吖，入到圍已經係一次紀錄，佢平時對我要求高，唔會開聲讚我，但今次佢都話我做得好，再加上走喺大街上，多咗好多年輕觀眾叫我，拉近咗我同大家嘅距離，我覺得得着好多啦！」

對於今次破格演出靈異題材電影，鮑姐透露初接到《殭》片劇本時一度拒拍：「怕啲靈異題材電影，又驚咁深沉嘅角色拍完之後好難抽離，但Juno（導演麥浚龍）再約我出嚟傾，佢講故事大綱令我淚流滿面，終於就決定接喇，點知第一日開工見到吳耀漢個爛面造型倒模，仲要浸滿血水，嚇到我三魂唔見七魄，好彩後來睇住佢化妝，一筆一筆畫上去，先覺得成件事冇咁恐怖！」為報答Juno的「知遇之恩」，鮑姐透露稍後兩人會有下一步的合作計劃：「詳情未講得住，但個角色好富挑戰性，係我從來未試過嘅！」