無綫提醒藝員小心 斥壹傳媒抹黑

壹傳媒早前被指屢次向無綫及無綫旗下藝人攻擊、刻意抹黑，其後遭無綫抵制，向他們旗下報章及雜誌下「逐客令」，禁止他們採訪無綫活動及旗下藝人。不過近日無綫有感壹傳媒有系統地繼續抹黑，無綫不排除會採取法律行動，昨日無綫更嚴正向藝人發出內部短訊，提醒藝人如收到《蘋果日報》、《壹週刊》、《忽然1周》或《FACE》記者電話時，要加倍小心。

另外，對於有一名前無綫PA於社交網力數無綫及暗名抹黑旗下藝人，《蘋果日報》被指藉此大做文章，開名指明寸林峯及吳卓羲，而《忽然1周》亦指江美儀因拍劇踩足三日，引致爆肺入院，在休息期間被劇組逼復工。對於種種抹黑藝人及無綫情況，無綫憤怒之餘，三位受害藝人昨日亦異口同聲指此舉動甚離譜。

林峯昨日在電視廣播城接受訪問，對於該PA指他滿口粗言，他說：「自己只想講一句說話，我做咗十幾年，可以問其他工作人員我有冇咁樣，我唔想幫人哋做宣傳，但啲同事戥我唔抵，仲話識咗我十幾年，唔好話講粗口，都未見過我鬧人，呢啲係惡意抹黑。」

曾勵珍：無中生有

吳卓羲接受本報電話訪問時對於有指他趕滿身汗味的替身落車，他指絕無此事：「如果臭，最臭就係我同林峯，係都我哋落車先，替身衫我自己都會着，點會嫌人臭。至於話啲服裝同事拮親我，人哋咁專業，點會拮到我，佢哋亦係我的前輩，錫佢哋都嚟唔切啦！」

對於前PA出書抹黑無綫一事，製作部總監曾勵珍昨日受訪時直指該名前PA只得半年資歷，根本沒資格去批判任何事：「每個製作人都要由PA做起，否則連通告都唔識排，劇本都唔識睇，當做錯嘢畀人鬧嘅話，好睇個人點諗，識諗會當係教你想你成材，而呢個人連PA都未學成就話畀人鬧，一定有問題，（言論影響無綫？）觀眾眼睛係雪亮，我都唔明對方咩用心，用冇常識嘅內容去誣衊人，無中生有唔係事實又何必呢！」

無綫製作資源部總監樂易玲對於內部發短訊提示一事說：「今次唔單止係藝員，連工作人員同經理人同事都提醒，因為好似江美儀事件咁，連一個問候電話寫出嚟都變成咁，而林峯同吳卓羲就更加無辜，無啦啦畀人抹黑，所以我提醒佢哋要更加小心保護自己，亦要提醒佢哋，無綫對『壹傳媒』嘅立場係冇變過。」

王晶：譁眾取寵

而導演王晶坦言該PA為出書行為有抽水、譁眾取寵之嫌，有指男藝人講粗口，他說：「講粗口好普通。（PA辛苦？）邊份工唔辛苦，依家呢個年代PA最舒服，以前自己帶晒睡袋、牙刷返工。」而曾做PA的崔建邦被問到做PA時曾否受過藝人以粗言對待，他說：「之前我做PA時套劇就係吳卓羲部《叛逃》，佢個人好好，好有禮貌，大家合作好開心。」