張栢芝上周六失驚無神帶兩名愛兒Lucas和Quintus從新加坡返港，除Mon實前夫謝霆鋒的「菲聞」，前晚栢芝更高調出巡撐緋聞男友釗峰，在台下又跳又唱搶盡C AllStar首次紅館騷風頭。

栢芝睇騷手舞足蹈，露出左臂紋身。

紋身

C AllStar開騷獻Sing兼晒肌。

釗峰（左）感觸爆喊，引得緋聞女友栢芝喊埋一份。

Jase（左起）、On仔、King、釗峰

栢芝日前突擊返港，前晚即撇下兩名兒子到紅館欣賞《CAllStar我們的胡士托演唱會》，睇足全場的她，除每首歌都跟着和唱外，又投入得手舞足蹈，當正自己開騷一樣，當組合獻唱其前夫謝霆鋒的《無聲仿有聲》及王菲的《冷戰》時，她亦琅琅上口跟着唱。

到C AllStar四子唱快歌部分，栢芝即時High爆，第一時間從座位企到通道，邊揮螢光棒邊跳舞，期間被發現左手臂內側有一個英文字「Ujah」的紋身。栢芝舉動惹來傳媒拍照，對於搶了「主人家」C AllStar風頭，她反怪責傳媒說：「人哋演唱會，尊重吓人啦！」還一手將記者攝影機推開。問到何時離港？栢芝竟詛咒自己：「唔走啦！（唔走？）係呀，因為我聽日就死！你哋尊重吓人哋演唱會啦，係咁拍我。」

陪釗峰喊埋一份

直至演唱會尾段C AllStar唱《家書》及《天梯》，成員On仔及釗峰感觸爆喊語塞，栢芝亦在台下喊埋一份，要拿紙巾抹淚。組合在鳴謝時提到栢芝，她即做出敬禮手勢回應。事後問到四子唱盡不少前輩歌曲，但為何未有選唱栢芝的經典歌曲《任何天氣》？他們即時補鑊對着攝影機唱了幾句，並解釋因Rundown太長而要Cut歌。另外，昨日有網友上載栢芝的兒子Lucas及Quintus的短片到微博，兩兄弟不停說「Hello」，萌到爆。