張智霖（Chilam）昨日出席賽馬活動時，被玄學家麥玲玲師傅大批馬年行好運，不但大紅大紫，更會添丁買樓，Chilam聞言即笑到四萬咁口說：「承你貴言！」既然老公賺大錢，老婆袁詠儀（靚靚）自然行大財運啦！

Chilam被批今年行大運兼有望添丁，心情大靚。

身穿紅色外套的麥玲玲與兩位財神合照，十分喜慶。

張智霖昨日以一身白馬王子造型，出席香港賽馬會舉行的《農曆新年賽馬日記者會》，麥玲玲師傅即場為Chilam批馬年運程，指他會大紅大紫、添丁及買樓，好運更會延續到羊年，Chilam聞言即笑說：「如果生十兄弟點算？」玲玲師傅指他會先多生一子才生女，他即笑到四萬咁口說：「承你貴言！」問到是否真的會生女，他說：「冇方程式話一定會生女，都係抱住順其自然嘅心態，子女都係天然，比任何計劃都嚟得重要。我哋係一對合法夫妻，有子女係好自然嘅事！（努力緊？）希望順其自然！」此外，玲玲師傅又指Chilam今年會行名氣運，其老婆靚靚更會行大財運：「Chilam賺到嘅錢全部落晒靚靚袋中！」

麥玲玲批影壇復甦

談到娛樂圈的來年運程，玲玲師傅表示「麻麻哋」：「講嘢要小心啲，容易招口舌，電影就唔錯，票房會復甦，樂壇會辛苦啲！」問到黃秋生選演藝人協會會長惹糾紛，她說：「呢個只係頭盤，往後仲多啲！」並指藝人今年北上搵人仔會很艱難：「內地好多都寧願選擇價錢比較低嘅藝人，當初章子怡去南京做動土，啲大星一郁就要200萬。（踢爆章子怡身價？）之前寫過啦！我聽客戶講啫！」