國際影星周潤發（發哥）出名喜歡自拍，昨日他在機場被超多粉絲集郵，發哥來者不拒，親民到爆。對於黃秋生被演藝人協會（演協）拒諸門外兼舌累地，發哥笑說：「佢又誇張咗啲嘅！」

發哥與發嫂一起到北京宣傳新片，相當恩愛。

發哥主動與學生合照，親民到爆。

周潤發昨日與太太陳薈蓮（發嫂）現身機場，出發到北京宣傳賀歲片《賭城風雲》及《西遊記之大鬧天宮》。戴帽和黑超的發哥，甫見記者即主動接受訪問，登機手續則由發嫂辦理。談到黃秋生有意角逐演協會長卻被拒諸門外，於是舌累地洩憤，發哥自言有緊貼報道並笑說：「佢不嬲都咁激，（太激進？）冇乜所謂，最緊要達到目的咪得囉。」對於秋生慘食閉門羹，發哥覺得當中可能有誤會：「有啲人可能揸正嚟，有啲人可能覺得隨時可以入會。」

秋生曾以發哥做例子戲言：「唔信周潤發冇交會費，會叫佢喺垃圾桶填表。」對此，發哥笑笑口說：「咁要問番入會過程先知，首先要批核咗先准入，咁就唔夠時間，要唔知幾多個會員通過先入得會，咁又啱喎，你舌累地都冇用，你係未合資格嘛！（秋生覺得唔受尊重。）佢又誇張咗啲嘅。（支持佢做會長？）如果幫到藝人謀福利，邊個做都冇所謂，佢應該有能力。」但發哥謙稱自己不懂管理人事，故無意參選。此外，發哥昨日雖沒有出席邵逸夫爵士（六叔）的追思會，但他指有機會會前往拜祭：「佢嘅電影、電視王國係六叔一手創辦，一切在心中。」對於拍新片時遭「孫悟空」甄子丹偷桃，他笑說：「佢邊夠膽，佢好尊敬我！」

主動與學生合照

一向被稱作自拍達人的發哥，見記者沿途「低炒」拍攝即說：「你咁樣影得我唔好睇！」並着記者要「高炒」。期間有不少粉絲向發哥索合照，他來者不拒，臨入閘時，一班學生發現發哥，他即主動折返與學生合照，滿足晒粉絲後，發哥才與耐心等候的發嫂入閘。