有意角逐演藝人協會會長的黃秋生日前被陳芷菁拒諸門外，兩人各執一詞演變成罵戰，事件前日雖然「停火」，但兩人昨日在邵逸夫追思會上撞到正，「零交流」下秋生更懶得望芷菁一眼。

因演協會長選舉而掀罵戰的秋生與芷菁，擦身而過但零交流。

陳芷菁

芷菁（右）全程望實秋生，奈何對方連眼尾也沒有望她。

秋生向六叔鞠躬致敬後，慰問六叔兒子及六嬸。

秋生到邵氏影城出席邵逸夫追思會，但竟然冤家路窄，皆因陳芷菁在場負責接待嘉賓，狹路相逢避無可避！秋生走到六叔巨型遺照前鞠躬後，隨即上前慰問方逸華，與芷菁雖近在咫尺，但眼尾都沒有望她一眼，反而芷菁禮貌地望向他，兩人最終沒有打招呼與傾談。

受訪時，秋生盛讚六叔一生功績偉大，今次屬笑喪：「我唔記得有冇見過佢，亦冇咁嘅榮幸同六叔食飯，當年喺TVB就成日仰望六叔間別墅。佢令香港成為東方荷里活，有大半功勞都係歸佢嘅，但係東方荷里活嘅時代已經過去，電影、電視嘅年代唔係話消失，係轉變緊。」

交律師發信申請入會

問到可有見到芷菁，秋生說：「我係嚟鞠躬，唔係嚟交流。等演協搞掂內部嘢先，已經透過律師發信申請咗入會、填晒表，程序做足，個波交番畀佢哋喇！我要做嘅已經做晒。」有傳若他當選會長，芷菁便會請辭？秋生對此說：「到時先算啦！拖都未拍就講生仔！（芷菁叫你放過佢？）十世前嘅事，回應咗啦！（演協內部混亂？）唔知！但係12個人入會都搞足成個禮拜。」

至於芷菁被問到秋生沒有望她一眼？她說：「佢戴住黑超，我唔知佢有冇望我！我就有望佢，係禮貌嚟嘅。（見到秋生尷尬嗎？）唔會！我係嚟做嘢，佢就嚟悼念，呢個都唔係說話場合。」並透露要再開會決定選舉演協會長日期。