出爐金馬獎及亞太影展的「最佳女配角」楊雁雁，心情至今尚未平復！自稱幸運的她甜爆表示獲老公送贈金錶作鼓勵，而拍攝時懷有身孕的她大讚女兒好腳頭，笑指與「馬」有緣！

於亞太影展再下一城的雁雁，興奮得非筆墨所能形容。

首踏「金馬」紅地氈的雁雁成功跑出封「最佳女配角」，相當威水！

愛錫女兒Vera的雁雁卻不會為對方減產，實行家庭事業兩兼顧。

雁雁在《爸》片與童星不乏對手戲，幸都能發揮出水準。

馬來西亞女演員楊雁雁憑電影《爸媽不在家》成為出爐金馬獎及亞太影展的「最佳女配角」，亦是兩大電影頒獎禮的大贏家！說得一口流利普通話的她，由細到大都看台灣電影，首次行「金馬」紅地氈便得獎的她表示幸運得似「發夢」：「坦白講，我哋係邊緣啲嘅，作為一個東南亞演員有得行紅地氈已經係夢想成真。」

得悉入圍時已激動到喊的雁雁，得獎一刻更是一片空白：「其實我唔確定係嗌我個名，我睇到隔籬導演跳起先知，我行落樓梯時都跌親，因為好激動同興奮，一邊行仲要一邊諗番我準備好嘅講稿。」在「亞太影展」舉行前，她對再奪「最佳女配角」只有50%的信心，現成功拿下亞太「最佳女配角」，只能再以「非常之激動」來形容心情：「一直都壓抑唔喊，但攞到亞太時真係忍唔住，全身震到停唔到，入後台就流眼淚。」

老公冧送金錶

佗住BB拍《爸》片的雁雁覺得女兒Vera好腳頭：「佢姓馬，我又攞金馬獎，同馬好有緣，而且囡囡屬龍，龍馬精神好意頭！」但她表示不會刻意為女兒減產：「一直以嚟都唔係多產嘅演員，同埋我好難分心，拍一套戲就要專心去做。」雖然此片在兩大頒獎禮上橫掃多個獎項，但劇組因趕走埠宣傳而未有機會正式慶功，雁雁卻甜蜜表示老公送了金錶給她作獎勵。問到還想嘗試演甚麼角色時，她說：「我好Open，乜都好，但唔好做媽媽。（加片酬？）未喺星馬以外拍過戲，到時再睇啦！」