由歌手轉型涉足商界的劉晨芝（Adrienne），擁有時裝店後生意愈做愈大，還撈埋娛樂事業在中環開Club，打算再開分店！單身的她不怕事業心強而沒有異性埋身，更懶理家人催婚！

劉晨芝進軍商界取得不俗成績，就算兼顧兩邊生意仍不覺辛苦。

事業得意但愛情失意，但劉晨芝依然享受單身貴族生活。

劉晨芝的夜店開幕時廣邀圈中人如張敬軒（左）及孫耀威，雄心壯志！

有「亞洲Beyonce」之稱的劉晨芝（Adrienne）百足咁多爪，不單止開時裝店賣衫，還涉足娛樂事業，在中環地標蘭桂坊開Club。Adrienne坦言在美國唱歌多年，認識不少外國歌手及文化，想引入更多類型的Show，故將Club命名為「Show Club」，表達多元化及新穎的意思。雖然忙得不可開交，但她堅持親自兼顧兩邊生意：「依家會集中睇住間Club先，自己都有顧住時裝舖入貨，惟有辛苦啲！我兩間舖都喺中環，可以兩邊走，日頭睇時裝舖，夜晚就顧番間Club招呼朋友。」

踏足商界已有一段時間的Adrienne坦言，學會不少生意之道：「力不到不為財，我每日都會喺Club，做好多PR同宣傳嘅事，事事都親力親為。」她又雄心壯志，已計劃將業務擴充：「有計劃開第二間舖，想喺其他地方、甚至國家開分店。」

唔恨做少奶奶

變身女強人的Adrienne依然單身，自言不怕沒有異性埋身，更懶理家人催婚：「我又唔係趕，最緊要搵個適合嘅人，屋企人都有講，但我唔理囉！我欣賞叻嘅男仔，所以擇偶條件係要有上進心同孝順，又肯幫我手睇舖同支持我。我唔一定要做幸福少奶奶，自己好鍾意做嘢，支持我就得啦！」面對好友樂基兒的離婚經歷，Adrienne並沒有因而對結婚卻步：「冇影響！依家離婚都好普遍，最緊要大家夾，但有時要變就變，冇得強求，總之我對結婚嘅睇法係冇變。」