王祖藍和女友李亞男今年得公司力撐情侶檔搵銀，揼本讓兩人出國「預支蜜月」！祖藍與早前帶囡囡「父女檔」上節目的胡諾言出席活動，人氣急升的胡仔大讚電視魔力強勁！

祖藍跟亞男愛得穩定，打風都打唔甩，現在更奉旨談情拍旅遊特輯，認真開心。

胡仔太太陳琪教女有一手，難怪教到Jay Jay如此精乖伶俐。

備受公司重用的胡仔（左）跟祖藍齊齊出席活動搵銀。

王祖藍和胡諾言日前出席活動，祖藍表示今年將奉旨和女友李亞男情侶檔工作，更能齊齊掘金，可謂一舉兩得：「呢一年我哋會一齊拍一個旅遊節目，又會開拍《老表2》，我最鍾意用公司資源做私人嘢，抵呀！又唔會話我忙得滯陪唔到佢，又可以有食一齊搵，不知幾高興！」

兩人將首次情侶檔做旅遊特輯主持，祖藍說：「每集會同啲情侶去唔同地方，由嘉賓揀目的地，佢哋揀完我就去搵Sponsor，所以仲同啲情侶聯絡緊，地點未定。」他笑言是次並非預支蜜月：「唔係預支蜜月，只係幫佢哋補度蜜月，實現佢哋嘅願望啫！我哋會睇吓嗰啲地方好唔好玩，見到邊度啱玩，第時再去都唔錯吖！」不過，祖藍大賣關子表示未可以公開嘉賓名單，只「吊癮」指保證令觀眾有驚喜。

赴台灣證魔力

胡諾言早前和女兒Jay Jay齊齊亮相無綫節目《爸B也Upgrade》，他笑言與女兒人氣急升：「真正感受到電視魔力好犀利，自從個節目出咗街，除咗我哋呢堆爸爸之外，原來好多家長都好鍾意啲小朋友。幸運地我個女表現OK，之前我哋去台灣旅行，好多人走埋嚟問『Jay Jay可唔可以同我影張相？』我個女好開心，啲朋友仲講笑話我個女仲出名過我。」