陳奕迅（Eason）前晚在頒獎禮中勇奪六獎稱霸全場，不再黑面的他自言滿意表現：「今日冇發台瘟，滿意自己表現，原來自己適合唱分半鐘嘅歌，或者兩、三個鐘嘅歌（指演唱會）。」但他隨即自嘲：「又唔夠氣、又肥、又唔Fit！自己鬧咗自己先，等人哋鬧起上嚟都輕手啲！」Eason又坦言不會因上次《叱咤》被狠批而生氣，但承認不夠專業：「冇所謂，有言論自由，好彩香港仲有，我有機會唱廣東歌都會繼續，上次準備真係唔夠！」談到他在台上與頒獎嘉賓徐小鳳吹水，他說：「好想睇佢唱歌，所以台上問佢幾時開騷。佢唱腔好正，字正腔圓！」問到小鳳姐與Eason傾甚麼？她說：「問我係咪開騷，我好歡迎佢！不過佢都要排隊，自己太耐冇開演唱會，好多歌手都話想嚟，我全部都歡迎！（唔驚畀人分薄唱歌時間？）我唔介意，願意同大家分享。」

小鳳姐與Eason在台上密密傾，非常老友！