天后容祖兒自言愛靚唔愛命，雖然有病在身，前晚她出席頒獎禮依然中門大開性感上陣！她又笑言自製「JY616」病菌傳染狄波拉，但男友劉浩龍（師兄）不但成功免疫，更廿四小時為祖兒服務，日頭作太陽，夜晚化做太陽能，認真暖在心！

容祖兒

祖兒同師兄愛得咁甜蜜，乜病都好番啦！

Kary在頒獎禮中性感到盡，全身透視！

G.E.M.勇奪金獎，歌唱實力獲得肯定！

樂壇天后容祖兒前晚在《第三十六屆十大中文金曲》中以V煞性感西裝上陣，勇奪五獎成為女歌手大贏家，早前抱恙死頂開個唱的她，雖然前晚依然有點聲沙，但獻唱得獎歌曲時得心應手，事後她表示已經康復六成，雖然有病在身，但自言貪靚的她堅持中門大開性感上陣，又自嘲要騷「微波爐」！

祖兒又自爆日前狄波拉（拉姑）請她食飯後，第二日便抱恙，她聞言即攬上身：「佢煮飯嗰時已經戴住口罩，第二日打畀佢，把聲仲差過我演唱會嗰幾日！其實拉姑話去睇我尾場時啲菌已經醞釀緊，隻菌叫『JY616』（祖兒英文名簡寫加生日日期）。」

祖兒又大讚男友劉浩龍（師兄）強壯，未有感染到「JY616」，談及台上DJ又將他們的戀情擺上枱，她大方表示不介意，而提到日前形容師兄為太陽時，她笑說：「係正能量！（咁夜晚呢？）太陽能囉！我都唔知自己講乜！」日前表示想36歲前生B的她被問到公司可會介意？她說：「暫時未有咁諗，咁大決定要審慎考慮，公司睇住我大，要同佢哋商量，其實40歲都唔遲，總之唔會走漏你哋！」

G.E.M.向林宥嘉宣戰

而憑《你把我灌醉》勇奪優秀流行國語歌曲金獎的鄧紫棋（G.E.M.），日前在內地歌唱節目《我是歌手2》第二集以《存在》的出色表現，獲譚詠麟、那英和汪峰等前輩大讚，她表示一直有食羅漢果養聲，又覺得現場觀眾的投票支持令她有動力唱下去，提到有傳男友台灣歌手林宥嘉有機會在曹格出局後補上參賽，她一概封口：「唔知，大家簽咗保密協議唔會講。（佢真係參賽咁點？）我唔介意！」G.E.M.更向男友宣戰：「睇佢贏唔贏到我！」