昨日演藝人執委選舉不歡而散，身為副會長的苗僑偉（三哥）臨時被召往開會，最後由他決定流會！問到新會長人選，他坦言個人推舉黃秋生，希望他帶同更多會員入會，令整個協會年輕化，但對秋生於門外的行為，則認為有點過激：「真係有啲過激！（被拒諸門外？）我都要為班理事講句公道話，係秋生未填好表，程序上係唔啱，唔係拒諸門外，而且音音姐又喺微博講一人獨大，邊有呢啲事！係我話要流會，既然今日搞成咁，咪集齊人再選過囉！」曾任演藝人協會副秘書長的谷祖琳則表示不在現場不清楚詳情：「演藝人協會一向都好團結，但昨日件事點解咁，我真係唔知！其實交會費同入會程序都好簡單，希望快啲再整合番件事，盡快選個會長出嚟，為個會同藝人出力。我支持黃秋生選會長，佢係適合人選，說話好有Point。」

苗僑偉指秋生行為過激．最後由他決定流會。