秋生碌地抗議「簡直係侮辱」
演藝人協會昨日選新會長，曾揚言角逐的黃秋生帶同候選團出戰，豈料被拒入會並遭趕走！秋生其後按多次門鐘但冇人理，嬲到碌地伸脷扮抽筋來宣洩不滿，其後又大發雷霆指︰「簡直係侮辱！」並揚言開新會對抗。而協會秘書長陳芷菁則指拒秋生入會做法正確︰「入會需要程序。」
未能成為會員選會長的秋生，在門外瞓地扮抽筋抗議，並鬧爆協會侮辱他！
演藝人開大會時，門外貼上通告禁止非會員進入，故秋生未能成功交表入會。
陳芷菁指秋生不依程序申請入會，指協會做法恰當。
秋生扮扔會章入垃圾桶洩憤。
除了扮抽筋，秋生激動到碌晒地！
秋生拿着會章指可即場入會，指有人故意刁難。
曾志偉早前辭去演藝人協會會長一職後，協會昨日選新一屆會長，曾揚言會角逐的黃秋生呼聲最高，豈料他昨日申請入會欲競逐會長時竟被趕走！據知，協會秘書長陳芷菁一直着他交會費搞入會，但他昨日才往填表，因審批入會需時，故她見秋生後即說︰「唔得喎！」委員之一、甘草演員梁珊開口趕秋生走，辣着他爆發內訌！
昨晨約10時半，秋生與無綫藝人郭少芸現身演藝人協會的觀塘會址樓下，他笑言今屆選會長冇對手，自嘲若其候選團全部當選會被指黑箱作業，並透露帶了萬幾元往入會。他又對入會手續有微言，斥協會似投資公司︰「如果選到會改會綱，咁先做到嘢。」期間，他在樓下巧遇芷菁，還點頭打招呼。上樓約10分鐘後，秋生與莊思敏離開指往買咖啡，不久他回來並激動地說︰「唔畀我入！你哋一齊上去，睇吓點樣。」及後，他與一班候選團如曾國祥等再殺上協會，現場見門外貼上「是日會員大會，非會員禁止入內」字樣。秋生試圖按鐘但冇人開門，他即發晦氣說︰「你睇吓，都費事理你！好冇人情味，似神秘會議！」此時，王祖藍在協會內步出，但未有透露內裏情況。
伸脷扮抽筋
未幾，秋生再次按鐘，雖然有人開門但再請他食「閉門羹」，他即火起怒斥協會做法相當侮辱︰「你睇吓對同業幾冇禮貌，幾侮辱！好似神聖組織，大家同行同業，熟口熟面，做咩事呢？」並拿起協會章程繼續炮轟︰「唔好同我講呢個（會章），係咪因為我唔係會員，就冇資格同佢哋律師討論呢個東西？冇權利發表？我將成份嘢交番畀曾志偉，我唔搞喇！嘥時間！佢哋請我去組織，但依家咁樣有咩意思！」
其後，秋生愈說愈激動，突然走到協會門前碌地抗議被拒入內，還四腳朝天伸脷扮抽筋，他說︰「如果有同行行過，好渴、好攰、抽筋、嘔白泡，都唔畀入去休息吓。」又拿起會章說︰「你會畀我休息吓，寫咗咁多嘢，又話協助藝人。」說畢即作狀把會章丟落垃圾桶。門外碌地後，秋生拉埋祖藍一行人離開，並指着對方說︰「佢係會員，係始作俑者。」其後，秋生表示要開新會，又指會搵成龍、志偉及郭富城等元老級支持，再大發雷霆地說︰「我唔排除成立新會，本來唔想搞，好火滾呀！唔選喇！唔關志偉事，係入面唔知邊個。（係咪頂唔順？）點頂啫！嘔白泡都唔畀入會，直情留難我！」
陳芷菁企硬
下午3時半，陳芷菁離開協會時透露，早上投票時有律師在場，約30多候選人出席，對於秋生被拒入會，她企硬說︰「幾個月一直有同秋生聯絡，要選就要申請做會員，係需要時間，唔係即入會即做候選人。（點解秋生唔入到會？）雖然藝人熟口熟面，但入會需要程序，如果即入會就做候選人，當時有好多候選人在場，有機會畀人話唔公平。佢入到嚟未跟程序就發脾氣，仲話我哋冇開會，有叫佢等埋律師再講，而且之前都有同佢律師通過電話。」強調歡迎對方入會，又指若他開新會亦冇所謂。
對於芷菁指曾多次通知他要先入會，秋生昨日在電話說︰「根據會章，我可以即時交表、即時入會，佢哋個律師都話合法，我哋咪跟會章，但佢竟然刁難人要拎份合約出嚟，咁搞係冇事搞事！使唔使攞個良民證添啊！今日一兩個喺入面話事，律師話啱規矩，佢就話唔啱，超越法律，會章大定一兩個人大啊？我問係咪跟會章做事，就話唔講呢啲，咁講咩？想同我談情？（心灰？）我唔會為弄權者而冇咗為演藝人謀福利嘅想法。」他又對跟他前來的藝人被當乞丐看待而感抱歉，自嘲一行人是閒人可組織「醬油會」（意指無謂閒人）。
另外，秋生對於參與稍後再舉行的選舉，自言仍屬未知數，但暗示與陳芷菁有你冇我：「首先要交代咗呢單先，至於會員資格，我就唔會叫人入會，到選嗰時總之見啲腳唔齊就唔選！（如果選到做會長，點協調新舊派合作？）我起初都叫芷菁留低，但依家唔好搞啦！佢合唔到人，處事不恰當，如果第時代表個會出去同其他單位、機構洽談，咁高傲點傾？（志偉同你通咗電話？）冇！好多人都勸我唔好做，諗住拋個心出嚟，點知遇不禮貌對待，行家都係咁，何況外人？」
