容祖兒與劉浩龍（師兄）自前年6月公開戀情後，愛得低調。但見「龍兒」感情漸趨穩定，除師兄在演唱會幾乎每晚都猶如男主人外，祖兒對師兄的愛也愈見公開，提到男友更愈講愈Sweet！

祖兒與劉浩龍曾被拍得消夜歎串燒，更當街拖手晒恩愛。

前年12月 甜蜜指數：***

祖兒被問到會否用「辣招」測試男友的愛時，她即說：「唔使咁重口味，唔使食辣嘢測試佢有幾鍾意我。」似乎想錫住師兄，不願對他施以辣招。

去年6月 甜蜜指數：****

祖兒度過了33歲生日，被問到師兄有否為她炮製生日驚喜？她一臉甜絲絲說：「有冇呢？少少啦！有啲啦！佢冇安排，所有嘢都係Last Minute先做，唔會怪責佢。」

去年9月 甜蜜指數：****

祖兒對於與師兄「蜜」遊美國，意猶未盡，更甜笑說：「好掛住美國，冇人跟就最開心，不過喺香港冇咩可能做得到。」足見渴望過二人世界。

去年11月 甜蜜指數：*****

祖兒為演唱會積極備戰期間出席活動時無奈表示只准吃雞胸和蛋白。問到男友有否陪伴訓練？她冧爆說：「好感激佢，唔使自己孤伶伶應戰，佢都會陪我食雞胸！」