祖兒操定副偈等生龍仔
樂壇天后容祖兒的紅館演唱會完美落幕，雖則臨尾幾場病住唱，卻與男友劉浩龍（師兄）「患病見真情」，事關傳師兄在後台打躉扮晒男主人。祖兒前晚首度發表愛的宣言護航，大讚師兄是靠得住的小太陽，更計劃3年內做媽咪，想盡快誕下「龍」的傳人！
恨做媽咪的祖兒揚言正調理身子等生B。
祖兒發表愛的宣言，大讚男友靠得住，不時給予正能量，患難見真情。
Encore時巨型Miffy公仔升上台，觀眾起哄大叫劉浩龍。祖兒換上綠色裙，向鍾情綠色的劉浩龍隔空傳情。
容祖兒一共15場的《ageas富通保險1314容祖兒演唱會》前晚終圓滿結束，在臨尾幾場抱病的她雖偶有沙聲，但在尾場可算回復狀態。祖兒在台上挺着假大肚，透露希望盡快一圓「媽咪夢」：「我都幾期待有屬於自己BB一刻，想留一個好血統延續落去，我發現社會咁襟做嘅唔係好多人，生個出嚟貢獻吓都好。」
數度感觸落淚
接近尾聲時，當祖兒與觀眾握手，她最愛的卡通人物巨型Miffy公仔突然現身台上，有觀眾調侃祖兒與師兄的戀情，大叫：「劉浩龍，除頭套！」祖兒笑說：「除帽？等我睇吓邊個先，跳舞轉圈轉得咁勁，唔係你哋諗嗰個嚟o架！」之後她應粉絲所求偷(目及)「套中人」，並笑說：「我唔識佢喎，阿強嚟o架！」Encore至近12時才完場，全晚更數度感觸落淚！
祖兒受訪時承認開唱期間，師兄陪足14晚。對於有指師兄高調踩場，並在後台打躉當正男主人，心痛男友被唱的祖兒首度開腔，主動為師兄澄清：「佢都幾低調，佢用咗最大嘅力量支持我，對我好重要，畀咗好多正能量我，好似一個太陽喺隔籬咁，講好多鼓勵說話。我都以為自己好多正能量，但食咗西藥有啲情緒，有時好灰，應該放個人喺度講啲開心嘢。唔只佢，屋企人都好好。（加晒分？）加分？點講呢，患難見真情，靠得住。」祖兒出動愛的宣言呵護師兄，「龍兒戀」Sweet爆指數可謂再度急升！
而多次在台上表示恨做媽咪的祖兒，直言希望36歲前成功造人：「畀個限期自己係36歲前，等我調理吓身子先，慢慢嚟啦！唔好嚇親佢（經理人霍汶希）。」
