陳奕迅因早前在叱咤頒獎禮「黑面兼表現失準」，傳他有意退下頒獎台宣布「唔玩」，昨日他澄清只是連月習慣做巡迴，一時未能適應出席頒獎禮，更指頒獎禮幾好玩，坦言有獎攞唔會唔Go，直情趕住仆倒去！

獲逾千Fans支持的Eason唔再做黑面「神」，仲直豎拇指畀Like添！

Eason拎住模型飛機玩到興起，笑到成個小朋友咁！

Eason拖住兩位小朋友出場，流露慈愛一面。

百厭星Eason舉起相機腳架擋住自己，搞笑！

昨日陳奕迅（Eason）在屯門市廣場為演唱會DVD舉行簽名會，吸引逾千人圍觀，並為500歌迷簽名。對於有傳將於《十大中文金曲頒獎禮》宣布不再攞獎？Eason說：「冇！點解咁傳？近排收好多慰問短訊，（叱咤）嗰日係『吽』，唔係唔開心。」他解釋因巡唱太忙，去年共唱了36場：「可能有啲攰，慣咗做Tour，返嚟做頒獎禮唱幾首歌，調節唔到。（嗰晚同經理人陳家瑛為呢件事喺後台鬧交？）佢唔喺現場，冇咁嘅事。」

Eason自爆反而四年前陳家瑛和唱片公司高層指他若不想出席頒獎禮便可以不去，但他出了唱片沒理由不去。他又連聲「冇冇冇」否認有「唔攞獎」想法：「如果唔想去，就唔會咁辛苦做完兩場巡迴，同屋企人去咗3日日本旅行就趕返嚟去新城頒獎禮，不如放多兩日假啦！」對網民批評他叱咤當晚表現欠專業？Eason說：「知個網民係邊個嘅話咪同佢笑番，要撐你點都撐，唔撐你做乜都唔撐啦。」他稱太太徐濠縈提議他多做運動，他亦認同需要Reset自己。

法國開騷媲美MJ

至於個唱DVD版權問題獨欠填詞人黃偉文的作品，Eason承認有擔心，亦感到可惜。提到他將於法國開騷，又一次令售票網死機？他坦言是繼米高積遜（MJ）後能在當地於20分鐘內售罄門票的歌星。

另外，昨午徐濠縈在微博上載與女兒陳康堤的合照，二人以紅色「母女鞋」出動，康堤跟母親一樣打扮潮爆，身高更已到母親膊頭。