出爐雙料視后田蕊妮這兩日連走3場活動，但人紅是非多，阿田在封視后當晚發表得獎感言，表示「由冇咩人睇嘅電視台開始做」，被指辣慶亞視高級副總裁葉家寶，並斥責她不飲水思源。二人昨晨首度同場，期間記者要求兩人合照，惜葉家寶不為所動，本已踏出一步的阿田亦被無綫職員阻擋。他們到達酒樓後再碰面，阿田大方表示不尷尬，提到被葉家寶指飲水不思源，她打趣說：「咁我返亞視做好冇？好似分咗手嘅戀人，大家距離好似愈來愈遠，男友冇喺人生進步，但見到女友分手後一路進步，好驚人哋唔知我哋拍過拖，周圍同人講係佢前女友。」

葉家寶跟阿田搭搭膊頭Friend番，更大方地影「世紀合照」。

識做的阿田（右）傍住無綫高層樂易玲雞啄唔斷。

葉家寶突然主動走向她，握手兼搭膊合照，他說：「我同佢講加油努力！」並着阿田不要忘本。問到是否怒氣已消？他說：「可能大家講嘢衝口而出。」提到阿田暗寸亞視冇進步，他認為亞視近年「飛躍進步」，只是將重心側重資訊和民生。其後，阿田洩氣地說：「大家都冇怨恨，識咗葉家寶好耐，唉！我以後唔講呢啲喇！」