「翻版苟芸慧」龍小菌與無綫花旦苟芸慧一直被指「撞樣」，難得「兩姊妹」昨日首度同場，期待合照的小菌企定定相認，無奈苟芸慧以為她是亞視人，加上被經理人制止，令「重逢」機會落空。

「正貨」苟姑娘誤認「A貨」是亞視人，不過依然風騷揮手。

龍小菌

小菌企定定等合照，但苟姑娘掛住坐埋一邊開餐。

王祖藍跟李亞男情侶檔上陣，亞視高層葉家寶（右）及冼偉智（左二）爭住合照。

出爐港姐陳凱琳身體力行支持慈善活動。

歌手龍小菌自去年6月除下面罩現「龍顏」後，一直被指與苟芸慧撞樣，更被指是翻版苟芸慧。而這對「孖生姊妹」昨日終有機會同場見面！苟姑娘與小菌昨日出席慈善活動，同場還有TVB的馬賽、港姐陳凱琳、李亞男與男友王祖藍，以及亞視高層與藝員等。自言要跟苟姑娘合照的小菌賣口乖，大讚苟姑娘比她靚女，更大方表示不介意合照，並企定定等影相。

然而，苟姑娘卻坐在另一邊施施然開餐，直至記者邀請埋位時，她竟然「點錯相」，並問：「（無綫人）係咪唔可以同亞視合照o架？」原來她誤認小菌是「亞視人」，當獲悉對方是歌手時，仍然一頭霧水，但都樂意上前與「孖生姊妹」相認，不過苟姑娘的經理人極速放低手上碗筷，衝上前出手截住苟姑娘並大呼：「大家食嘢先啦！」並安排無綫員工「護送」苟姑娘返回座位，兩人無緣合照，場面尷尬！

撐「身形唔重要」

至於影「重逢合照」撻Q的小菌則繼續企定定，甚為無奈，除了傻笑打圓場外，又為「好姊妹」解畫：「我都係第一次遇到呢啲情況，我都唔係好識處理，你哋體諒吓我，不過我尊重佢公司同佢個人嘅意願。（覺得唔通情達理？）唔會嘅，其實我都冇所謂！」對於苟姑娘早前因甲狀腺問題導致暴肥，身形曾暴脹的小菌亦幫對方講說話：「其實大家唔好淨係集中喺藝人嘅身形，最緊要係健康同心情好，身形唔係最重要。」