有份提名「飛躍進步女藝員」的王君馨近日是非不絕，前日她轉黐高海寧訴苦，連對方去廁所亦跟到實！昨日君馨試戰衣時亦信心爆棚，穿Tube Dress「峰」騷晒香肩！

近日的是非無損君馨揀戰衣的雅興，更「峰」肩同晒，索到爆！

對高Ling狂呻的君馨（左）講到口擘擘，更講足兩粒鐘！

無論高Ling（中）行到邊，君馨（左）都要做黐身膏藥。

君馨希望以一招「前後通殺」搶鏡，連玉背都唔放過。

落力Keep Fit的祥仔勁有自信，以短打上陣。

王君馨繼早前傳與徐子珊不和，上月又傳向「星夢幫」鬆踭，慘變新一代是非精！為免受排擠，君馨黐實「無綫咪神」高海寧（高Ling），前日下午三時半與另一名女友人到中環High Tea。期間，君馨向高Ling吐苦水，講到七情上面兼口擘擘，傾足兩小時後，高Ling準備去廁所，君馨似乎怕被冷落，迅即跟實對方，其後先行離開。記者上前追問君馨要去哪？高Ling笑說：「佢有嘢做走先！」

鬆踭得啖笑

此外，君馨在無綫台慶頒獎禮中獲提名「飛躍進步女藝員」，昨日她到觀塘嚴選戰衣時，先後穿上銀色及黃色的長裙晚裝，大騷香肩！談到早前的鬆踭事件，她說：「其實當日啲舞步係排舞師設計，以後我會對鏡頭小心啲！我哋成個星夢Family都好好，報道一出佢哋都得啖笑，Fred（鄭俊弘）都話件事好Stupid！」

提到首次獲提名，君馨大感興奮，問到可有信心奪獎？她說：「唔知呀！但依家出街聽到大家講《My盛Lady》中嗰三句金句，係另類嘅開心。其實邊個攞獎都開心，不過我知道岑麗香付出咗好多！」她希望黃子華或馬國明奪視帝、老友鍾嘉欣膺視后。

祥仔飲湯Keep Fit

另一邊廂，憑《法外風雲》角逐視帝的黎耀祥，日前到著名時裝設計師何國鉦的公司挑選戰衣，祥仔透露現忙於拍攝新劇《男大當婚》及Keep Fit：「我每日都飲太太嘅湯水，連湯渣都食埋，同埋食火龍果同香蕉。（淨係食生果夠體力咩？）猩猩咁大隻都係食香蕉之嘛！」