謝賢（四哥）、胡楓和Joe Junior昨日出席節目《三個小生去旅行》慰勞宴，四哥甫見Joe便為網上流傳爆粗短片一事向他鞠躬道歉！據悉節目因收視報捷而將添食拍續集，延續熱潮！

四哥（左）向Joe（右）道歉，修哥夾在中間笑笑口。

四哥（左起）、胡楓和Joe旅行時大膽嘗新，盡顯可愛一面！

《三個小生》人氣爆燈，陳庭欣也到場支持胡楓。

謝賢、胡楓和Joe Junior昨日出席《三個小生去旅行》慰勞宴，四哥見到Joe時即表示要為早前爆粗催促對方上車之事道歉，而Joe則大方地說：「冇！你都係請我食『滷味』啫！」四哥更向他鞠躬：「真係對唔住喇！請咗你食蝦餃燒賣（意指粗口）。」但他又搞笑讚自己：「不過又講得幾好聽喎衰鬼！又幾流利喎，原來我都有呢個天分！（私底下成日講粗口？）梗係唔係，我最憎就係講粗口，我發誓唔再講！」

談到前新抱張栢芝日前爆出有新歡，四哥說：「恭喜佢！不過唔好問家事好唔好？乖啦！（有拐B案，會否擔心孫仔畀人拐走？）我孫仔好多人保護，個個聽到係我個孫都唔好意思搞！」他又開玩笑說：「我同啲人好熟，個B遲早都搵得番，我話聲就會攞番出嚟！」

拉曾江周驄拍續集

據悉《三》將會添食，屆時會加入曾江和周驄兩大60年代小生，由「三個小生」變成「四個小生加Junior」！而劇組正構思到特別的地方進行拍攝，但還未詢問四哥檔期。問到添食時，四哥笑說：「唔拍喇！拍埋晒啲爛臭片、爛鬼節目！啲私隱畀人聽到晒！如果唔係24小時拍住都可以考慮！（收視高過《最佳女主角》！）多謝導演帶挈，本來我係條鹹魚，都有少少郁，不過未翻生！」而修哥及Joe希望下次能坐郵輪拍攝，但修哥笑言不想再將逾廿件行李每日搬上搬落60多次。