型男張家輝、劉青雲及古天樂昨日在北京宣傳電影，有泰國「最美變性人」之稱的Poydtreechada直言在片中與「老公」家輝咀嘴十分幸福，更大讚他最靚仔！家輝亦自爆主動獻吻，但笑言吻技不及「經驗豐富」的古仔！

三名迷你版「西門吹雪」可愛到暈，難怪古仔（左起）、家輝和青雲笑逐顏開。

Poy有幸與型男家輝咀嘴，冧到暈！

三大型男張家輝、劉青雲和古天樂昨日偕導演陳木勝，在北京出席主演電影《掃毒》首映，片中飾演大毒梟女兒的泰國「最美變性人」Poydtreechada（Poy）亦遠道從泰國趕到現場。席間大會安排了三名迷你版「西門吹雪」上台，大唱主題曲《誓要入刀山》，三位男主角見狀即父愛氾濫，不禁抱起他們合唱！

提到與家輝拍攝的咀戲，Poy冧爆表示很幸福，又大讚家輝十分體貼：「其實家輝哥好照顧我嘅感受，我亦一再話畀自己聽『我係演員』，所以呢場戲拍得好放鬆。」家輝則自爆做主動：「拍嘅時候我奮不顧身咁錫落去，我感覺到佢有啲驚。」問到家輝的吻技如何？家輝即搶答：「冇古仔咁好！古仔拍過好多愛情片，同好多女演員拍過吻戲，技術一定比較好！唔似我哋拍得比較少。」說畢青雲即抵死反駁：「咪話『我哋』，我都拍過好多愛情片，我就係拍愛情片走紅！」

「老婆」讚最靚仔

對於片中三位型男，Poy大讚他們全都很紳士及專業，問到哪一位最帥？她大讚「老公」家輝：「我戲裏面嘅老公最靚仔！」至於跟她沒有感情戲的青雲，則在旁表示十分遺憾：「我同Poy只係得一場戲，太少喇！仲要係我用槍指住佢個頭！」至於與袁泉飾演夫妻的古仔，則自爆在戲內對太太很差，故希望給她一個擁抱。