「笑匠」黃子華新劇前晚首播收視高開，還趕及入圍今日公布的視帝候選名單，將與「Cool魔」張智霖一決高下！視后則有深得全台藝員喜愛的田蕊妮，惡戰呼聲極高的鍾嘉欣。

黃子華趕得切「入閘」，挾新劇高開下隨時成為「進擊之視帝」！（資料圖片）

張智霖平常心面對頒獎禮，不想有太大壓力。

鍾嘉欣台慶夜大熱倒灶輸畀田蕊妮，下月正本戲誓報一箭之仇！

田蕊妮

無綫《萬千星輝頒獎典禮2013》將於下月16日舉行，視帝、后鬥到入大直路，但據可靠消息指，子華的新劇《My盛Lady》雖然前晚首播，但仍趕及入圍今日公布的「最佳男主角」候選名單，將與《衝上雲霄II》「Cool魔」張智霖（Chilam）及《老表，你好嘢！》王祖藍一決高下，相反無綫當家小生林峯及鄭嘉穎因冇劇而沒入圍。「最佳女主角」方面，剛贏得「藝人心目中的視后」的田蕊妮繼續狙擊視后大熱鍾嘉欣、上屆盟主楊怡及收視開紅盤的《My》劇徐子珊，話題劇《金枝慾孽貳》蔡少芬及伍詠薇亦雙雙入圍。

對於趕及入圍視帝戰，子華笑言當贏：「播一集就有提名，當贏咗！（威脅Chilam稱帝？）唔好咁講，Chilam係好受歡迎嘅演員！不過佢個劇播嗰時我好忙，唔好意思冇睇到，但唔使質疑，我見過佢如何深受歡迎，佢攞，我都開心！（稱帝冇信心？）平常心，我要返加拿大探屋企人，唔知出唔出席到頒獎禮，可能出席冇獎，唔出席反而有意外驚喜呢！」《My》劇首播錄得平均29點、最高31點收視，還有觀眾致電無綫讚賞劇情吸引、對白抵死，子華聞言幽默地說：「多謝支持，我都有睇，有忍笑，節奏好快，對自己表現滿意，最想觀眾睇得開心！我拍劇唔多，唔清楚點數概念，《男親女愛》最高收視係50點，29同31點算唔算高呢？」

讚勁敵演得好笑

突然殺出「程咬金」，Chilam昨日出席三星電子香港舉辦的首屆《Solve for Tomorrow》活動時先禮後兵，盛讚子華：「我都有睇子華，好好笑。（視帝多咗個勁敵？）有競爭先有進步，我平常心，有獎攞，當然係最好啦！」

另外，今年頒獎禮繼續玩民選，「我最喜愛的電視男、女角色」百分百由觀眾選出，視帝視后則由觀眾及專業評審各佔一半分數選出，無綫將繼續送巨獎吸引市民參與。