性感女神周秀娜前晚出席電影首映時力谷「蟠桃胸」，吸引全場目光！其緋聞男友關楚耀亦被電暈，狂讚娜姐演技有進步，但娜姐卻無情落閘，表示兩人只屬普通朋友。

娜姐落力谷出「蟠桃胸」，雖然搞到冇氣抖，但夠晒搶鏡！

童冰玉「事業心」似乎亦不比娜姐弱！

Jeana不讓娜姐專美，露出小蠻腰突擊。

《爆》片演員傾巢而出，場面熱鬧。

周秀娜上台時獲徐天佑（左）及關楚耀攙扶，猶如女王出巡！

周秀娜、盧頌之、余曉彤及導演卓韻芝等，前晚出席電影《爆3俏嬌娃》首映，娜姐落力谷出「蟠桃胸」，大騷四吋事業線！她笑言抖唔到氣，並透露背後的拉鏈差點爆開：「拍呢部戲時我哋好Fit，依家可能肥咗啲。（拍拖心廣體胖？）唔係呀！我仲係單身！」問到會否跟緋聞男友關楚耀（Kelvin）再結伴睇戲？她避忌地說：「有機會一定睇多幾次，甚至叫朋友包場，本身有叫父母嚟。（父母唔到係因為怕見家長？）唔係呀！我哋真係普通朋友。」她表示對票房有信心，問到若票房理想，可會穿得更「爆」？她即表示交由平日收收埋埋的卓韻芝負責。

恨定格（目及）「女友」

Kelvin全晚狂出冧功，對娜姐有讚冇彈，除了大讚其打扮配合主題外，又說：「覺得佢不斷進步，尤其係演技上，好瞓身又唔錫身！希望電影快啲出DVD，唔知有冇3D版呢？（想定格睇娜姐？）感覺唔同嘅！（娜姐叫朋友包場睇戲？）佢好多朋友，我睇DVD得啦！我都想帶父母嚟捧場。（包場畀兩家人一齊睇？）冇諗呢啲喎！」提到娜姐愛「下廚男」，他即透露將主持飲食節目，並指對方愛吃得清淡，相當清楚「女友」的口味！此外，各人在台上互爆秘密，Kelvin指娜姐在片場扭傷腳會自己捽，並讚娜姐具備專業態度。

另外，何佩瑜（Jeana）身穿露腰裝到場，問到好友陳靜（DaDa）因閃退被追討80萬至100萬元賠償金，她驚訝地說：「點解呀？合約上嘅嘢我唔清楚，要顧掂自己先。（DaDa禍不單行？）人生總有起跌，大家都係後生女。」問到會否以財力支持好友？她即表示要養家。