瞬間榮升老爺兼爺爺的劉丹（丹爺），對於新抱楊冪被指懷孕，他昨日透過電話難掩喜悅地笑說：「唔係呀？係咪周刊講o架？佢冇同我講喎！如果係，幾時都咁開心！（怕小器唔講得？）我唔會小器，總之1月8號佢哋會講o架啦！（獎勵新抱？）唔使啦！」不過，守口如瓶的丹爺坦言恨抱孫，孫仔或孫女都冇所謂：「唔使講，我梗係希望（抱孫）啦！依家見到人哋啲蘇蝦好得意，都好想有番個。（有催佢哋造人？）唔使啦！呢啲隨緣，佢哋應該有計劃o架啦！」

劉丹娶新抱又有孫抱，講起都Happy呀！

此外，丹爺又表示早知二人已註冊結婚：「楊冪好到不得了，有修養、有家教、尊重長輩，呢啲女仔好難得，娶到呢個新抱真係好開心，以前畀95分，依家畀105分。」