廖碧兒於4年前一次偶然機會下接觸外國酒莊，從此便入迷，並努力鑽研釀酒方法，既修讀證書課程，又花了逾七位數字在美國及法國釀製紅、白酒，由揀葡萄至酒樽木塞、以及品牌名字也一手包辦，不過碧兒並非計劃做生意，僅釀製一定數量款待親友及作慈善用途。

碧兒釀酒只為喜好，沒有計劃搞生意。

碧兒既修讀課程又親自釀酒。

碧兒在美國的酒莊參觀葡萄園，體驗釀酒的過程。

碧兒在酒莊參觀，趁機學習釀酒。

比賽奪獎

以往研究紅酒、白酒均是男士的玩意，不過廖碧兒卻打破傳統，約4年前，碧兒在工作及私人生活都不如意，正在嚴寒的溫哥華拍攝陳嘉上執導電影《King of Fighters》的她，趁假期隨大隊飛到三藩市內的Napa Valley酒莊，於芸芸細酒莊中，認識一名酒莊主人，並細聽了關於他的釀酒愛情故事，激發起她釀酒的決心。

下決心釀酒後，碧兒開始在網上尋找釀酒資料，打了很多電話，幸運地碰上一名老伯伯：「佢係一個中間人，可以幫手買地、釀酒等，開頭佢問我鍾意咩味，其實我呢方面真係零，後來佢索性叫我過嚟睇，結果我用咗3日完成呢個Trip，出發前伯伯講明要着牛仔褲同舊波鞋，呢個令我好開心，可能之前佢接觸好多人鍾意靚，多數都係去古堡同睇名品牌酒，但唔係我要嘅嘢。」在伯伯引導下，碧兒認識了葡萄未成熟到熟透過程：「個心開始卜卜聲有癮，之後就扑錘釀咗白酒、紅酒各一桶。」

花時間進修

釀酒期間百無聊賴，碧兒又跟伯伯到法國波爾多，並於當地一個古堡家庭住宿，每朝跟屋主睇葡萄及睇酒廠，該屋主還給碧兒品嘗1953年紅酒：「法國人住古堡嘅屋好多都會留酒畀下一個屋主，一個個傳落去，所以我先飲到咁舊年份嘅酒，嗰次Trip都學到好多嘢，但返嚟之後同一啲識得品酒嘅人交流時，都唔係幾溝通到，咁咪把心一橫去搵課程讀囉！」

從第一階段開始，碧兒花了3年時間考至第四階段，她自言成績已不錯，又指有人試過花了9年時間也未能衝破第四階段，不過她卻有信心戰勝第四階段的最終站─Master of Wine：「呢個真係幾難，要花好多時間讀，但我認為值得。」此外，她又親自為自家品牌取名「Bellavizio」：「呢個係意大利文，意思係美麗的誤會，我覺得對自己嚟講好有意思，仲有係釀酒過程認識一個做木桶嘅家庭，佢哋造嘅木桶由法國寄去美國，一年都唔超過5個，但好彩佢畀其中一個Quota我，雖然好貴，但我想做到最好，所以都唔理咁多。」

興趣最重要

雖然對釀酒有濃厚的興趣，但碧兒坦言從沒想過視釀酒為生意，因她只想把自家品牌的酒用來招呼朋友，即使在美國與法國兩地花了逾7位數字釀酒，但對於碧兒來說，興趣大於一切：「唔一定要賺錢嘢嘅，有時做慈善都可以好開心，所以嚟緊睇吓有冇機會將啲酒做慈善用途，希望以後一年可以飛4次去睇吓啲酒，當係放假囉！」

後記：贏得美人歸

廖碧兒表示每樽紅酒均有一個故事，就如在三藩市的Napa Valley酒莊內，一個關於年輕農夫與女學生的愛情故事，便令她印象深刻，故事是一名為酒莊打理葡萄的年輕農夫，為心儀女學生釀製獨一無二的紅酒，每朝放在巴士站送給該女學生，一段日子後，農夫終露真身向女學生表白，兩人繼而拍拖，與農夫感情要好的酒莊屋主獲悉後，更為二人辦喜宴及送農地給他們，碧兒說：「就係呢個古仔打動我去釀酒，覺得好浪漫。」