劉嘉玲前晚戴上價值連城的翡翠首飾出席活動，隨年紀漸長，她愈來愈喜愛翡翠，還有意買翡翠作投資。她指翡翠升值比磚頭還要快，加上買屋麻煩，令向來愛投資磚頭的她也要重新計劃一下。

獨立的嘉玲表示不會叫老公送翡翠，因自己出錢買更開心。

周汶錡表示肚皮暫時未有聲氣，並大叫加油！

悉心打扮的汪詩詩及楊小娟畀面撐場。

汪詩詩

戴上價值3千萬港元翡翠首飾的嘉玲，前晚出席中國頂級翡翠珠寶品牌昭儀翠屋首間香港精品店開幕慶典，她在瑰麗的翡翠映襯下倍覺雍容華貴！嘉玲表示年紀大而愛上翡翠：「依家啲翡翠加咗新元素，好Fashion！呢啲係中國文化，亞洲獨有嘅珍寶，要承傳落去。（有冇收藏？）嘩！你知唔知幾貴？我應該早少少買，唔應該買磚頭，升得仲快，追都追唔到，物以罕為貴，幾倍幾倍咁升！（唔夠你間一億屋咁貴？）呢啲翡翠同藝術品仲值錢過磚頭，我要重新計劃吓，翡翠易存放同埋可以戴出嚟，買屋好麻煩，要交稅，啲租客又可能會投訴！」

億元新居未扑錘

提到近日有傳於上海購入逾億元的新居，嘉玲即澄清並未買入，仍在斟洽中：「內地買樓好多限制，我係有咁嘅意向，但有好多條件要傾。（會唔會因為曝咗光而唔買？）唔會，嗰度係AA Grade，好值得投資。（用嚟自住？）邊住得晒咁多，用嚟出租或投資。（幾時決定？）唔會好耐，因為好搶手！」嘉玲又透露近兩、三年才學懂做生意：「屋企人同身邊一啲錫我嘅朋友都驚我畀人呃，叫我唔好亂做生意，買磚頭穩陣。依家大個咗同成熟咗，可以試吓做生意。（買磚頭方面偉仔有冇畀意見？）係我畀意見佢，佢依家出手仲快過我，好專業！」

周汶錡撐造人

對於被拍到與老公夫妻Look吃消夜，嘉玲說：「白色Tee牛仔褲加件黑色Jacket，好Common！」同場還有周汶錡、楊小娟及汪詩詩，問到妹妹周麗淇表示想生兩個小朋友，周汶錡大表贊成：「佢開心最緊要，佢一直都好鍾意小朋友，愛心爆棚，如果有能力湊可以生多啲。」