性格火爆的歌手吳國敬昨日凌晨與女友Elaine在中環街頭起爭執，喝到爛醉如泥的Elaine瑟縮於樓梯口，雖然吳國敬已三番四次請女友起身，但她仍毫無反應，吳國敬最終睇唔過眼，「敬」而遠之撇低女友鬆人！

女友坐喺後樓梯發酒癲鬧人，搞到吳國敬鬼咁無奈。

等到唔耐煩的吳國敬叉晒腰，最終拂袖而去丟低女友。

吳國敬與女友Elaine相戀多年，並非第一次發生爭執。

現年48歲的歌手吳國敬情路曲折，早年與已故音樂人戴思聰女兒戴蘊慧拍拖慘被棒打鴛鴦，與前亞視演員仲春菲的戀情亦在2003年宣布玩完，跟現任女友Elaine拍拖多年，但又 不時發生爭執，四年前Elaine更被影到在夜店向男友面部狠狠送上「無情」，不過二人依然打得火熱。

昨日凌晨1時15分，兩人被發現在中環四寶大廈後門發生拗撬，事緣前晚吳國敬偕女友與一班朋友慶祝萬聖節，Elaine玩得太過盡興，不勝酒力的她在男友陪同下，坐在大廈後門的樓梯口回氣，期間她疑因酒後亂性發噏風，共說了六次「算啦！」和四次「你得嘅！」面對醉到迷迷糊糊的女友，吳國敬表現無奈，只見他不停撥頭髮和拉扯外套，雖曾叫女友起身，但她仍動也不動，冇晒符的吳國敬終於忍不住，一時眼火爆自己走人，留下女友抱頭痛哭。

酒量淺杯駁杯

昨日問到吳國敬與女友在中環嗌交一事，他說：「咩呀？飲醉酒啫，成班朋友去完萬聖節Party，嗌咩交啫？諗住出去截的士，想叫佢坐樓梯抖吓，我都知有人偷影。（平時女友飲唔飲得？）就係唔飲得，飲到行唔到，但氣氛太好，玩得開心得滯就飲多咗，平時好少飲，自己都有少少醉，但知女友飲醉都要照顧佢。」

其實吳國敬惹火早有前科，除了與女友爭執外，2010年他因噪音問題被投訴，與鄰居發生爭執，更因持刀恐嚇對方而被判守行為9個月，同年亦傳出吳國敬與組合BIG FOUR成員梁漢文、張衞健和蘇永康等好友鬧不和。