滕麗名婚前目標減10磅

滕麗名及黎諾懿等為劇集《愛．回家》宣傳，計劃明年初與男友拉埋天窗的滕麗名透露男友正籌備婚禮：「我要開工所以淨係攞咗個人出嚟，同埋畀咗幾個日期佢。（男友唔詐型？）佢不知幾開心，有任務喎！（對婚禮有咩要求？）唔好喺香港搞。」她又表示最頭痛的是賓客名單和減肥：「目標係減10磅！不過都只係去番正常磅數，因為前排真係肥咗好多。（有婚前恐懼症？）冇喎，啲人話計劃結婚嘅過程會嗌到七彩，不過我咩都冇理，所以都冇嗌。」