岑麗香昨日在活動上再遇被傳力追她的大隻仔溫家偉，兩人合照時，張兆輝做電燈膽，更與大隻仔「打交」！而香香前晚在劇中舔腳板一幕，慘被惡搞成意淫圖。

香香在劇中大晒身材吸睛，伸脷舔腳一幕更被打格仔惡搞！

張兆輝（中）做電燈膽之餘，更為香香同溫家偉「死過」！

子珊跟Chok爆天華企到咁埋，唔驚又被搶鏡咩？

溫家偉（中）慘被同劇的陳志健（右）等「施酷刑」。

無綫藝員張兆輝、謝天華、徐子珊及岑麗香等昨日到商場宣傳劇集《神鎗狙擊》，頭幾集香香相當搶鏡，經常穿背心晒激凸身材，前晚一集她被騙用口水醫水泡，竟伸脷舔腳，結果被惡搞，將其腳板打格仔，並留下意淫評論！對此，她說：「我要澄清，咁核突嘅水泡腳係化妝化出嚟，希望大家唔好將個焦點放喺身材同打格仔度，今次拍劇大家都好努力！」

而她與前大隻港男溫家偉的緋聞亦成為焦點，起初合照時，張兆輝夾在兩人中間並笑說：「我企中間會阻住喎！」溫家偉說：「你知就好啦！」兩人即你推我讓，又扮打交，非常搞笑！但香香及溫家偉均否認緋聞，香香說：「係好朋友，但目前以工作為主，呢一年都好忙。」擺明想令大隻仔知難而退！

天華自比靚佬湯

至於謝天華在劇中邊攀山邊講電話，亦被網友鬧爆誇張，他笑言原本沒講電話一幕，但他希望加強戲劇效果，於是臨時加料：「想令個角色更Chok，湯告魯斯（Tom Cruise）拍戲都徒手攀山，但佢冇講電話，我想型過佢嘛！」至於張兆輝亦力撐情節只為了營造視覺效果，希望觀眾以欣賞的角度睇劇。對於拍檔周海媚被指形象老氣，他說：「佢唔係食咗防腐劑咩？我覺得形象同佢好匹配。」

子珊大方認低威

此外，子珊不介意在劇中被香香搶風頭，並大讚她可愛：「我抵輸，佢拍得好辛苦，得佢一個女仔做飛虎係好突出。（你諗過做打女？）唔啦！可能大家見我識跳舞，但係做打女好辛苦，又易受傷。」