年初回復單身的性感女神周秀娜，昨日被《好報》踢爆有新歡，向內地高富帥送波餅兼摸黑調情，她昨日在電話中風騷地承認多追求者，有意經營香水生意的她自稱體味多人愛，故不少追求者爭住投資。

娜姐風騷自爆多人追，「性感女神」確非浪得虛名！（資料圖片）

娜姐肉緊地攬實高富帥兼大送秋波，其後拖手離開。

《好報》昨日獨家踢爆娜姐與內地高富帥於北京街頭纏綿。

娜姐年初斬斷與陳偉成（Avis）的6年情絲後，Dry足9個月，她昨日被《好報》踢爆秘密搭上從事科網生意的內地溫姓高富帥，並於北京摸黑調情兼攬實對方派波餅。不過，娜姐昨日在電話中強調仍是單身，卻冧爆地說︰「佢又靚仔又事業有成，係好嘢，嗰晚難得同朋友食飯，飲多咗少少，佢扶一扶我。任何一個努力追求我嘅男仔都有機會，我只知努力工作，男朋友嘅嘢，佢哋接受到女朋友忙到冇時間陪自己先算啦！」卻不願多談「新歡」的背景。

「體味」多人爭

此外，娜姐承認多追求者兼打本給她經營香水生意的傳聞，她笑說︰「可能佢哋鍾意我啲體味啩？窈窕淑女，君子好逑！總之依家唔心急，慢慢揀。」問到是否對港男失信心而轉嗒內地男？她說︰「咁啱人夾人夾到咪一齊，冇話特別去邊搵另一半。」而娜姐舊愛Avis亦不愁寂寞，拖住新歡尹蓁晞（Yumi）試大床，更全程密密啜，娜姐對此不欲多談︰「大家有大家生活，佢哋嘅嘢我冇回應！」

Avis昨日在微博大晒與Yumi出海的合照，其後他在電話中祝福娜姐有新歡︰「吓！係咩？恭喜佢，如果係真嘅話，都希望佢幸福快樂！我同佢嘅嘢都過咗去，唔想再講。」