女星雨僑及許亦妮因拍攝電影《喜愛夜蒲3》爭做女主角、爭戲份而屢傳不和，昨日劇組拍攝遊船河的場面，出動半百比堅尼女郎，雨僑以超性感比堅尼谷出「事業線」，成功撼贏全場最保守、只着一件頭泳衣的許亦妮。

雨僑谷出深長「事業線」，成為全場焦點。

以一件頭泳衣上陣的許亦妮即被比下去。

Jeana上圍突然縮水，略為遜色喎！

林德信亦半裸騷腹肌示人。

《喜愛夜蒲3》出動半百比堅尼女郎拍攝遊船河場面，相當大陣仗！

新片《喜愛夜蒲3》三位女主角雨僑、許亦妮、何佩瑜（Jeana）及半百比堅尼女郎，加上林子祥兒子林德信、歌手陳柏宇及應昌佑等，昨日在導演錢國偉的率領下，拍攝遊船河大晒冷。眾女齊齊穿上性感比堅尼於船上拍攝，為求「凸」圍，各自出盡法寶搶鏡，不過當幾十位比堅尼女郎現身時，唯獨許亦妮以一件頭泳衣示人，毫無睇頭！而一向不吝嗇身材的Jeana上圍突然縮水，令谷胸拋出深長「事業線」的雨僑立即成為焦點。

「初吻」獻韓仔

由於清晨已開始拍攝，眾女略有疲態，而三位女主角有不少機會同場，但全程零交流。出盡風頭的雨僑最風騷，並興奮自爆：「一嚟到見到件泳衣都好驚，因為怕會走光，第一次着比堅尼工作，都幾緊張，而且同場其他人都好性感。（怕唔怕比下去？）天外有天，人外有人，冇得咁比。今日我仲會獻出埋自己螢幕初吻，因為場戲講我同林德信一齊去船P，佢係我未婚夫，但我就同另一個韓國男仔偷食，而佢就同Jeana偷食。」

至於許亦妮的「保守」泳衣可謂輸足全程，但她卻死撐說：「畀多啲唔同嘅嘢人哋睇嘛！（會唔會想着比堅尼多啲？）我唔介意，都係睇佢哋安排，唔覺得輸蝕，我都好靚呀！」她又表示戲中跟陳柏宇飾演一對，還會有親熱戲：「我冇拍過親熱戲，所以都好緊張！（有冇乜特別要準備？）都冇乜，好快就入到戲！」