女星張文慈早前曾在節目中自爆撞破前男友偷食，她自言認清花心男後，心情極速復原，可謂無痛失戀。而目前仍然單身的她，笑言即使被逼婚仍不為所動，原因是「無謂嘥時間」！

張文慈雖然經歷過情傷，但仍然對未來充滿信心！

張文慈認為未來的另一半要有相同信仰。

張文慈（右二）早前接受now TV節目《出軌》的訪問，自爆撞破前男友偷食。

張文慈（Pinky）曾在now TV節目《出軌》中自爆撞破前男友偷食的經歷，但自幼已練成剛強性格的她，表示三日已極速復原：「個男仔過咗幾日有嚟我屋企拍門，但我好決絕咁同佢講：『你走！再上嚟我就報警！』然後我喊咗三日就冇事，因為平時我最怕人哋對我好，唔想欠咗人，但如果佢對我衰，我反而會超快清醒，因為對方唔值得愛，再勉強落去只會搞到自己仲痛！」

渴望遇到Mr. Right

雖然曾親眼目擊前男友出軌，但Pinky仍然樂觀面對男女關係，更表示寧缺勿濫，即使親友逼婚亦謝絕「求祈嫁」：「我承認細細個會因為想人陪同怕寂寞而搵男朋友，但依家已經幾年冇拍拖喇！唔想求祈搵一個人嫁，無謂嘥時間，其實親戚朋友仲急過我，佢哋同我講：『你快啲求祈搵個人嫁啦！』但我每次都只會同佢哋講：『你相信我啦！我一定會好幸福！』」儘管暫時未遇到Mr. Right，但Pinky表示仍然期待另一半早日來臨：「我唔敢Set死擇偶條件，但希望佢人品同心地好，最好有才華啦！同埋大家要有相同信仰！」