去年憑《最佳男主角》一炮而紅的無綫主持黎芷珊，入行30年來一直默默耕耘，不過成名之路不易行，她早年於內地採訪期間曾試過被公安扣留，更試過險死於劫匪槍下，芷珊的遭遇力證成功並非僥倖！

黎芷珊入行30年終於成功上位，背後的付出和經歷不容忽視！

芷珊自謂為人好相處，所以嘉賓跟她談話時毫不保留。

成為了最佳主持，芷珊今年再開拍《最佳女主角》！

黎芷珊成為「最佳主持」後，今年添食開拍《最佳女主角》，獲劉嘉玲、趙薇等一眾巨星力撐擔任嘉賓，身經百戰的芷珊面對任何巨星，仍然有方法令對方口若懸河，問到其成功秘訣，她笑說：「可能我份人好易相處，平時都唔問咩尖銳問題，反而令到對方舒服，願意透露多啲！」

死裏逃生轉數快

面對口密的對手，芷珊笑說要「愛鬥大」：「其實睇你夠唔夠膽同受訪者將問題拋來拋去，新主持易被人嚇窒，但我做得耐咪同受訪者鬥大，有時仲會互相寸嚟寸去！」

對於當初如何訓練膽識，芷珊即大爆早年死裏逃生的經歷：「十幾年前我做《城市追擊》主持，有一次喺旺角做採訪，點知忽然聽到有槍戰，原來有人打劫銀行，我同幾個女同事就不顧危險衝過去，諗住做採訪，去到就見到有人被射傷腳坐喺街邊，我哋仲隊咪訪問佢，不過最後都做唔成訪問，因為我哋畀警察趕。其實諗番都好牙煙，當時情況好混亂，完全唔知匪徒喺邊！」她又說：「有次返內地偏遠山區採訪一對孖女撫養權嘅問題，點知當地村民見到記者就好激動，想打我哋之餘又報公安，公安將我哋扣留問話，仲收起回鄉證，當時我好驚無得返香港。不過就係呢啲經歷令我轉數快咗，面對突發事亦處變不驚！」芷珊面對種種困難仍永不言敗，難怪得以成功！