女子組合Super Girls日前換上性感晚裝行Catwalk，在台上爭妍鬥麗，獲大批粉絲撐場，五人更大晒身材鬥騷Quali，雖然最後由Jessica高票勝出，但五人姊妹情深，強調絕無暗鬥之餘，更互笠高帽稱「女神」！

化身「小龍女」的Jessica，力壓隊友獲封「最索女神」。

露膊兼晒長腿的Super Girls，在台上載歌載舞。

Super Girls早前出席活動，穿上不同的晚裝行Catwalk。
（左起）Aka、Cheronna、Heidi、Jessica、Yanny

跳唱女子組合Super Girls早前出席活動，五人穿上不同的晚裝行Catwalk，各出奇謀騷靚膊、晒長腿，力爭「最索女神」稱號，五位美少女花枝招展，自然吸引一班龍友舉機喪影，最終由化身「小龍女」的Jessica力壓隊友脫穎而出。問到有冇隊員麻麻煩煩要揀衫着？化身「司法女神」的Cheronna笑說：「梗係冇啦！不過我覺得自己扮女神唔似，因為Yanny嘅女神Feel最重。」被「笠高帽」的Yanny說：「哎吔！唔好咁講啦！大家都係女神。」

近期Super Girls工作量激增，問到可擔心壓力爆煲？隊長Aka大派定心丸說：「雖然工作量多咗，會有壓力，但我哋有咩都會拎出嚟講。」在旁的Heidi補充說：「如果有壓力會一齊去食雪糕，之後再一齊跑步。」Jessica則說：「仲會約埋一齊去按腳添！」

渴望出寫真

提到娛樂圈中有不少女藝人及歌手一味靠「露」博上位，問到五人可會擔心被搶「峰」頭？Jessica則自嘲：「我哋都冇嘢睇，公司話過我哋係走健康路線。」Heidi又說：「我哋要做好歌手嘅本分，不過都有興趣出寫真o架！」

而Aka則大讚鍾嘉欣BB的寫真健康又性感，希望可以倣效她，推出一本大玩生活品味的相集。