啟剛繼續追 晶晶餵母乳
霍啟剛與郭晶晶的愛兒昨日首度曝光，一家三口溫馨照由「最美麗嫲嫲」朱玲玲親自操刀，而初為人父的啟剛昨午召開記者會時，難掩興奮心情，四萬咁口表示BB五官似晶晶，動靜似自己，更揚言會生多幾個！
啟剛與晶晶抱着囝囝一家三口留影，日前剛分娩的晶晶精神飽滿。
提到妻兒便四萬咁口的啟剛，因微博發不到相一度心急，並於記者會上以平板電腦晒相。
朱玲玲探完乖孫，笑不攏嘴。
已故全國政協副主席霍英東長孫霍啟剛一索得男，前跳水公主郭晶晶本月27日凌晨在養和醫院誕下麟兒，榮升太嫲的呂燕妮、爺爺霍震霆及嫲嫲朱玲玲連日出入醫院探孫兒，四代同堂相當高興。昨晨9時許，熱愛攝影的朱玲玲帶齊攝影器材拍下孫兒趣致一刻，而啟剛昨午發放給傳媒的照片，正是由朱玲玲操刀。相中身穿恤衫的啟剛笑不攏嘴，薄施脂粉的晶晶精神甚佳，首度公開亮相的「霍四代」BB於母親懷中眼仔睩睩，雖只見其側面，但五官輪廓精緻，鼻高眼大，深得父母遺傳。
爆料指啟山被催婚
朱玲玲昨晨11時半離開醫院時仍否認親自操刀，只透露晶晶餵母乳，啟剛於記者會卻踢爆：「媽咪話唔係影開人像，平時影花花草草，佢都怕醜，同你哋講唔係（影全家福），但其實係佢影，佢都緊張，今朝過嚟試光擺位，咁我都覺得BB第一張相係要媽咪影！」初為人父的啟剛難掩喜悅，並準備講詞，他感激朋友祝福，笑言送來的禮物令辦公室變成貨倉：「最開心我嫲嫲同公公，四代同堂。我哋都榮升一輩，細佬做咗叔叔，大家都多咗責任。」說得興起，他還風趣地說：「我喺度要爆料，媽咪同細佬講：『你下一步都要諗吓點計劃』！」
陪入產房感動到喊
「霍四代」的降臨令霍家上下大為緊張，而打算順產的晶晶，因分娩前BB未轉頭，故最後要半身麻醉剖腹分娩，陪入產房的啟剛說：「可能BB（於母體）瞓得舒服，我哋由06等到第二日06都未生得，醫生話唔好等咁耐，所以開刀。（你有冇喊？）有，好感動。第一次抱BB時有啲驚，始終佢太細太脆弱。」問到BB似誰？他笑說：「呢樣見仁見智，媽咪話似晶晶多過我，自己睇BB就日日唔同，佢好多動靜，可以話性格似我，佢生出嚟就四圍望，好奇心好強。」他表示BB未改名，有意夾時辰八字，但並非迷信，只是想多聽各方意見：「自己外國讀番書，中文係有限公司，爹哋畀好多意見，嫲嫲都話個名重要，由於BB係第四代，如果有中英文名一定會公布。」他又讚晶晶：「BB出世後先知做母親好偉大，條路先啱啱開始。」
微博發相遇阻滯
問到會否追多個，啟剛即說：「一步一步嚟！我都響應生多啲，政府話依家出生率只平均0.7%。」有傳他請了五個陪月員、揀日子生仔、打多仔針及成立億元基金，他一概否認：「我哋要求冇咁高，係有請陪月，但唔係要一群人！」今次晶晶生BB，啟剛凡事親力親為，BB出世後即在微博公布，昨日他亦嘗試第一時間於微博發相，但起初未能成功，要以換頭像作「公布」，但最後亦成功上載。
朱玲玲傍晚接受電話訪問時承認為孫兒操刀拍照，而且「很快搞掂」：「第二張已經OK，佢哋都好鍾意，BB啱啱冇瞓覺，眼仔睩睩。（BB似晶晶？）係，但都有一大半似啟剛，唔係好似我，下一個先似我啦！都想佢哋生多幾個，見佢好Enjoy做爹哋，呢個係佢新開始。」對於向啟山催婚，她笑說：「唔係，結婚呢啲冇得逼。（佢有冇帶女友Lea T.見你？）冇，個仔話唔係女友。」
