51歲鎮宇「髮」功吸99%觀眾

無綫重頭劇《衝上雲霄II》前晚首播，兩名型爆中佬張智霖及吳鎮宇螢幕鬥Chok，難免惹來比較，前晚Chilam飾演的「Cool魔」化身型爆機師Chok足全場，41歲的他「防腐」得宜猶如三十出頭，鎅女王除了冧暈劇中飾演模特兒的朱璇，亦贏得萬千女粉絲追捧，於網絡討論區中贏盡人氣。而於第一輯型爆的「Sam哥」吳鎮宇，前晚「反高潮」以頹爆皺皮寡佬Look於尾段登場，雖然頭髮亂了卻成全晚最高收視點，足見叫座力驚人。今次Cool魔鬥Sam哥，一個搶人氣、一個搶收視，各擅勝場。

望再創經典角色

《衝II》首播收視高開平均32點，最高收視35點達99%觀眾收看，成無綫今年至今首集最高收視劇集，成績理想。昨日於微博留言指「飲得杯落」的Chilam，正身在新加坡與家人旅行，本報記者致電恭喜他時，他說：「自問盡力做冇諗咁多，希望繼續好落去，好似以前初哥哥（《十月初五的月亮》角色）咁經典。」他又透露飾演Chok到盡的「Cool魔」有一定壓力，笑言拍攝時心態「誠惶誠恐」。提到Cool魔Chok贏Sam哥時，他即說：「千祈唔好咁講，我最憎內訌，成績好唔係一個人嘅力量，係全體人嘅精神。」

而鎮宇聞得收視高開，昨日於電話訪問中直言興奮開心，但又倍感壓力：「驚收視跌番落去，今日（即昨日）要返內地宣傳電影，但如果無綫有宣傳會盡力配合，或者一齊返嚟睇結局。」對於亂髮登場，他解釋：「因為講我未做番機師，監製想前後有區別先摷亂個頭。」而首集被Chilam搶盡風頭，鎮宇笑說：「頭段交畀佢，之後就到我！」他昨日亦在微博留言：「聽講頹廢Look不合某些人胃口，沒辦法，飛機頭只是開飛機時才會用上，等等，耐心點。」

法拉撞彩贏焦點

監製陳維冠亦解畫：「唔好話邊個贏邊個輸，演員要配合角色去演。」他預告Sam哥將型爆回歸，而昨晚播出「Zoe之死」，亦為觀眾拆解Sam哥頹喪之謎。

至於與鎮宇爭奪波衫成全晚收視亮點，身在紐約的陳法拉昨晚接受長途電話訪問時表示興奮，更指最高收視點那一幕拍攝時是誤打誤撞：「原本要拍河景戲，但天雨關係取消咗，估唔到搵到呢條巷仔，拍出嚟效果都好好。」她更感激鎮宇在造型上給予意見，以行動粉碎不和傳聞，她說：「劇裏面嗰個好Punk嘅造型我從來未試過，好多謝劇組，鎮宇都畀好多意見我。」對於被指因不配合宣傳觸怒無綫，她解釋因身在國外才未能配合，更表示下月返港會協助宣傳。而她於首集露底褲邊亦惹起網上話題。

吳鎮宇

年齡：51歲

身高：1米82

角色：唐亦琛（Sam哥）

賣點：專業、專一、集體回憶

張智霖

年齡：41歲

身高：1米80

角色：顧夏陽（Cool魔）

賣點：Chok王、𠝹女聖手、金句王