冥婚湯鎮業：娛業圈嘅恥辱

梁思浩為谷收視願與翁美玲舉行冥婚。

梁思浩、岑寶兒為幫有線谷收視，不惜抽死人水，計劃在主持的節目《怪談》內與已故藝人翁美玲及鍾保羅冥婚，此舉令有線捱轟。曾與翁美玲拍拖的湯鎮業得悉事件更狂罵節目「炒作」、「呃神騙鬼」、「娛樂圈嘅恥辱」！

梁思浩為谷收視願與翁美玲舉行冥婚。

與鍾保羅冥婚，阿夢心驚膽戰。

曾與翁美玲拍拖的湯鎮業鬧爆有線的行為是「娛樂圈嘅恥辱！」

有線藝員巴士巡遊，為節目造勢。

翁美玲

藝人梁思浩、岑寶兒（阿夢）及盧海鵬等昨日在尖沙咀巴士巡遊及在街頭派扇，為有線兩個新頻道造勢，有線長青靈異節目《怪談》主持思浩表示有新搞作吸收視，以及為有線爭取免費電視牌：「呢個節目做咗8年，每次都有突破，今年啲高層度咗條橋，就係同已經過咗身嘅藝人冥婚。」他透露監製本來提議冥婚對象為張國榮和梅艷芳：「我同阿夢都唔贊成，因為佢哋係好多人嘅超級偶像，我哋怕啲Fans不滿，最後變咗一係我娶翁美玲，一係阿夢嫁鍾保羅（Paul），結果阿夢抽中生死籌，要同阿Paul結婚，今個月尾就要Book靈堂準備。」他又指製作團隊已找到翁美玲及鍾保羅的骨灰位，問到有否詢問二人的家人時，思浩說：「我哋嘗試搵過阿Paul嘅家人，如果佢哋反對，就會再開會討論，我哋都曾經接觸過梅媽傾呢件事，不過最後就因我哋達唔到梅媽某啲要求而拉倒。」

炒作兼呃神騙鬼

對於冥婚，阿夢表示勁驚：「始終係陰陽配，我連人都未嫁，但係要嫁畀鬼。（怕影響第日結婚？）思浩話如果我嫁唔出，佢就娶我喎！但其實可以將真實冥婚事件帶畀大家，都係好值得嘅。」二人又表示因Paul很年輕便逝世，生前未婚及有很多心願未了，今次當作是幫Paul還一個心願，思浩表示若反應熱烈，他亦會冥婚。

曾和翁美玲拍拖的湯鎮業聽聞此事便狂罵：「唔只我，我諗一般人聽到都唔舒服。呢個題材完全係炒作，呃神騙鬼，佢哋（梁思浩、翁美玲）兩個三唔識七，佢收咗好多錢呀？」他又表示從未打算冥婚：「我同阿翁嘅感情放喺心中就得，始終過咗身，佢哋都要尊重番家人同Fans感受。係娛樂圈嘅恥辱，為咗谷收視，就算做節目都唔可以擺死人上枱。」

兩位故人的生前好友盧敏儀和苗僑偉（三哥）均不贊成以冥婚搞噱頭，認為對死者不敬，盧敏儀說：「我覺得呢啲係吹噓，當然唔贊成佢哋搞呢啲嘢，死者又唔能夠反對，對人家唔尊重又再揭人傷心事。」三哥則說：「我唔明個節目目的係乜！」

曾展章撐冇過界

至於梁思浩表示曾聯絡梅艷芳媽媽覃美金，梅媽受訪時勞氣地說：「梁思浩係搵過我上節目，以為講我單官司啦！點知話要去山頭野嶺拍，我梗係唔去啦！佢哋冇講過冥婚喎，佢哋再亂講，或者佢哋敢搞，我實採取法律行動，梗係唔贊成幫阿梅搞冥婚，人生時都唔搞呢啲嘢。」《怪談》監製佐治表示不擔心被鬧抽水：「只係想帶多啲多元化畀觀眾，我哋係當功德咁做。」有線高層曾展章亦表示做節目有底線：「我哋通過靈媒了解過死者本身係願意，亦經死者家人同意先會做，如果唔得係唔會勉強。」而該節目於8月播放。