高海寧朱璇捍衞幸福拒做「小三」

「小三」一詞難聽又負面，不少女藝人怕被觀眾定型，紛紛謝絕「小三」角色，難得高海寧與朱璇樂於接受做「小三」命運。不過現實生活中，兩人堅拒做「小三」，一於做個愛情路上的烈女！

高海寧（高Ling）身材火辣誘人，毫不吝嗇驕人身材，一雙電眼更迷倒不少宅男，加上她在幕前的形象嬌嗲可人，絕對是做「小三」的「好材料」，難得她不怕角色定型，勇於踏進「小三界」：「可能因為我試過出道頭兩年完全冇接觸過劇集，唔似得人哋可以劇接劇咁，所以每次有得拍劇都覺得係一個機會，而且呢類角色更加有發揮，況且一個演員咩角色都要做，只要唔好將演員嘅生活帶落本身嘅生活就OK！」

主動退出三角戀

雖說有潛質飾演「小三」角色，但不代表現實生活中亦同樣接受，高Ling耍手擰頭堅拒做第三者：「我一定唔會﹗呢個係原則性嘅問題，因為我生活喺一個好幸福嘅家庭，成日都覺得家庭係要有責任，變相我拍拖都有自己嘅準則。有女朋友嘅已經唔會喺我考慮範圍之內，有老婆就更加唔會考慮，我過唔到自己嗰關﹗如果要揀一條難行嘅路，我寧願揀一條簡單嘅路，係我自己幸福嘅路﹗」

不過，並非所有男性都可以抵擋誘惑，面對出軌偷食的賤男，高Ling肯定會灑脫退出關係，將對方打入冷宮：「我會即刻走﹗如果佢承認有第三者，我會直接話『OK，我退出，你哋繼續啦﹗』，唔會再同佢哋糾纏落去。」寧願「硬食」失戀的痛楚，高Ling也堅持離場，全因三個字－「唔值得」：「傷係自己嘅，但選擇係啱，就算我爭佢返嚟，佢都唔值得我對佢好，咁點解我仲要去爭？我拍拖嘅次數一隻手數得晒，雖然經驗唔多，但我好清楚我唔要啲咩，同埋有咩接受唔到，我絕對唔會為啖氣而繼續一段三角關係。」

幸福家庭中長大

高Ling對「小三」一詞如此決絕，全因嚴厲的家教，加上身邊的朋友和親人，個個感情生活幸福美滿，在「小三」絕迹的環境下長大，自然反對做第三者：「可能我屋企比較傳統，而我舅父又係軍人，所有嘢都要好有紀律，連對愛情嘅觀念我都好傳統。佢哋一直都灌輸呢啲訊息畀我，令我覺得家庭教育好緊要，所以一定唔會做『小三』。」高Ling堅守一對一的愛情傳統，更以玩具比喻愛情：「由細到大我接受嘅教育係，如果呢樣係人哋嘅玩具咁，我就一定唔會爭嚟玩﹗」家教如此嚴苛，難怪高Ling做事有規有矩，面對愛情亦堅守原則，對於做「小三」，答案自然是「No Way」﹗

無論現實還是拍劇，「小三」的角色同樣尷尬，畢竟演得愈好愈易被觀眾責罵，甚至討厭，現年26歲的前華姐冠軍朱璇「深明大義」：「我唔抗拒演小三，亦想試一啲唔正面嘅角色，想畀觀眾多啲新鮮感。」問到怕不怕影響形象？她說：「唔擔心，不過唔希望做得太多，怕成日做同一類型角色觀眾會睇到悶。」她又指家人會支持和理解她：「做『小三』會有啲尷尬，不過唔驚屋企人擔心，我每日最少打一次電話畀佢哋，呢個習慣已經好多年，佢哋好了解我性格，知道係工作需要。」

坦率的性格令她對感情毫不拖泥帶水，如有朋友甘願做「小三」，她會主動勸對方退出「戰線」：「如果真係有朋友咁，我會勸佢諗清楚，搞清楚個關係先，必要時甚至會勸佢放棄！」若有身邊人不幸被「小三」介入，思想成熟的她說：「除咗『鬧』對方外，其實雙方都有責任，兩個人都應該檢討，睇吓係咪溝通出現問題。」

難忍「老公」不忠

自言是「非典型」白羊座的她，性格有時較為倔強，雖然她未試過遇上「小三」，但亦不怕狂蜂浪蝶，更樂觀地表示這樣才代表她「有眼光」：「唔怕，有競爭係好事，證明我有眼光，揀得好嘛！」對於婚姻大事，還未結婚的她表示絕對不能容忍「老公」不忠：「如果老公不忠一定唔會原諒，呢啲事有一次就有第二次，容易重犯變『積犯』，而且關係破壞得太深，好難再收復。」雖然她斬釘截鐵地說「不能原諒」，但面對家庭壓力，她的態度亦不禁軟化：「如果已經有仔女，我都知好難咁瀟灑，到咗唔同年紀，可能睇嘢都會唔同。」

最怕「曖昧」關係

人細鬼大的朱璇雖然曾暗戀法籍教師，但她的情路卻「五隻手指數得晒」，全因性格慢熱的她常令對方等到「滾水都變冰水」：「我性格好慢熱，好難真係鍾意一個人，或者好耐先發現到，啲男仔等得一年半載，到我有感覺時已經唔知去咗邊！」此外，在少女情懷最熾熱的那段歲月裏，她要經常游走各地，因此並不容易拍拖：「最恨拍拖嗰個年紀我成日周圍去，由北京到法國，再到20歲嚟香港，好難Keep到關係。」

朱璇性格爽朗，樣子標致可人，自然大受異性歡迎。不過，原來她十分害怕曖昧關係：「朋友同情人我分得好清楚，我好怕唔清唔楚嘅感覺，唔想令人誤會。」雖然身邊不乏追求者，但她的愛情觸覺卻不甚靈敏：「我好遲鈍o架！要對方講到出口先知，對愛情唔夠敏感，如果我真係Feel到『有嘢』，我會拉開距離睇定啲先，不過對方多數冇咁好耐性。」不諱言已習慣一個人生活的她，其實很怕拍拖：「突然多咗一個人我又要慢慢適應，而且好似人愈大愈難心動。（怕唔怕孤獨終老？）希望仲會心動啦！咁諗會唔會好天真？」

後記：女人心

高海寧身材一向索爆，本以為她對自己身材亦相當滿意，但原來她也與全港女士一樣，有怕肥的一面。當攝影師要求她做舉手的動作時，高Ling突然顯得尷尬，原來是怕手臂看起來很肥。其實高Ling身材Fit爆，大可放心擺甫士影相呢！另一方面，性格爽朗的朱璇，想不到原來是宅女一名，閒時愛看漫畫和文學作品，雖然她自嘲是一個「悶人」，但性格率直的她，身邊不乏男性好友，幸她對感情處理得有條不紊，說穿了，其實也是怕傷害身邊的人。