胸猛娜姐艷爆紅地氈

《第32屆香港電影金像獎》昨日假文化中心舉行，紅地氈艷光處處，女星爭妍鬥麗，劉嘉玲以一身火紅長裙配億元鑽飾力壓周秀娜及排骨仙文詠珊（Janice Man），並邀得形象指導郭慶彬品評女星。

影后劉嘉玲打扮密實，穿紅色Valentino長裙行紅地氈，但佩戴近1億元的卡地亞鑽飾，絕對是「貴」氣逼人！問到是否專誠穿紅衫旺夫？她說：「唔係，着黑白都攞o架啦，係咪？」首次角逐「最佳女主角」的江若琳同樣封胸上陣，她佩戴由英皇珠寶贊助，價值1,200萬鑽石耳環及400萬手鐲，每邊十卡的鑽石耳環更是閃耀全場，穿Elie Saab貼身長裙的她盡展玲瓏浮凸的身材，因穿了七吋高跟鞋，她落樓梯時亦險些跌倒，她笑說：「平生未着過咁高！好在身手好！」

身材好唔驚走光

同場出席的女星為搶風頭亦無懼「胸險」，寧願黐膠紙防走光，仍堅持真空上陣！首次擔任頒獎嘉賓的周秀娜中門大開兼真空上陣，勁騷「Big爆」上圍和香肩，問到如何保持胸部堅挺？她笑說：「件衫設計好，自己身材都好。（驚唔驚移位走光）唔驚，反而驚高踭鞋，同埋我黐咗好多膠紙，落車之前會檢查好先。」問到以一身戰鬥格示人是否想博投資者找她拍戲？她則微笑否認。同樣中門大開的模Art文詠珊，雖然平平無奇，但以露Nude Bra及騷骨感搶鏡，坦言沒有Push的她被問是否受情傷而變瘦時，她說：「冇，不過食無定時啫！」

藝人黃婉曼大方拋胸，勁晒5吋事業線，談到「變臉」疑雲，她自嘲沒以前漂亮，又指人會變，更自爆冇Push，但冇安全感。內地演員張藍心則露出誘人雙肩，大騷3吋事業線，而名模馬詩慧跟女兒王曼喜齊齊穿上黑色露背及腰性感長裙出席。

青雲奪最佳衣着

此外，劉青雲與太太郭藹明共佩戴逾150萬港元的伯爵珠寶首飾行紅地氈，而青雲更奪得大會頒發的最佳衣着獎，獲伯爵珠寶送出18K袖手鈕作獎品，已兩次獲得該獎的他笑言專攻服裝獎，更表示該獎項因對手太多所以最難攞，認真幽默。

劉嘉玲太過穩陣

全紅裙似乎穩陣咗少少，耳環同銀色Clutch係靚，不過平時嘉玲姐都好艷光四射，所以覺得今次成個Look平實得嚟唔夠艷麗。

梁朝偉瀟灑型爆

我好鍾意佢上身三件頭配搭嘅打扮，簡直瀟灑得嚟又有型！真係好有心思，特別係佢揀咗藍色煲呔，感覺好Trendy。