中港台齊爭女配角 DaDa爆炸力驚人！
金像獎最佳女配角一戰競爭激烈，入圍者包括中、港、台演員，年齡層面甚廣，當中最後生的本地模陳靜（DaDa）越級挑戰多位前輩，她笑言想跟同片的邵音音雙雙得獎，但要回復Fit爆身段行紅地氈！
今屆香港電影金像獎最佳女配角的入圍者「網羅」中港台演員，包括模陳靜（DaDa）、台灣歌手范曉萱、資深演員邵音音、金燕玲及內地女星江一燕，眾人在片中各有發揮機會，當中最後生的24歲候選人DaDa以往予人只賣樣賣身材的印象，但在電影《低俗喜劇》中「爆炸糖」一角演出破格，為上位不惜為電影人提供「特別服務」，令人留下深刻印象，因而被視為熱門人選。
去年底DaDa憑《低》片入圍台灣金馬獎，今次再獲認同，她的感覺更是興奮：「今次喺自己土生土長嘅地方得到提名，比上次更大鼓勵，好似發夢咁！我細細個就鍾意睇戲，冇諗過可以參與呢個盛會，可以同咁多前輩同場，好開心！」
被睇好有壓力
問到有何事前準備？她笑言首先要積極減肥，因不停狂食令身形「發福」不少：「拍戲時同事買好多嘢食嚟探班，之前又病冇體力做運動，最近開始搵健身教練陪我做Gym，同埋慢慢食少啲，我要食嘢先有動力，唔可以一下子禁食。」
DaDa表示名單公布後，不少朋友也睇好她，紛紛給予鼓勵，令她感到無形壓力，問到是否有信心跑出？她笑言不敢跟同片的前輩邵音音爭獎：「音音姐叫我唔好同佢爭，我梗係唔敢啦！但之後佢話不如一齊拎吖！如果係咁就最好，話唔想得獎都係假嘅，不過所有提名人都好犀利，我唔敢諗太多，總之部戲愈多獎就愈開心！」
金像獎提名名單
最佳女配角
邵音音《低俗喜劇》
陳靜《低俗喜劇》
江一燕《消失的子彈》
金燕玲《逆戰》
范曉萱《聽風者》
新進導演
周顯揚《大追捕》
謝立文《麥兜噹噹伴我心》
馮志強《懸紅》
被不少好友睇好攞獎的DaDa，感到很大壓力。
DaDa最近搵健身教練陪做Gym，操Fit身形。
DaDa在片中演出破格，令人留下深刻印象。
老戲骨邵音音（左二）的演技毋庸置疑，DaDa（右二）希望大家一齊攞獎。